بۇگىن تالدىقورعانداعى ب. ريموۆا اتىنداعى دراما تەاترىندا 8 ناۋرىز مەرەكەسىنە وراي جەتىسۋ وبلىسىنىڭ اكىمى بەيبىت يساباەۆ جەتىسۋلىق ايەلدەردى قۇتتىقتادى. مەرەكەلىك شاراعا 500 ادام شاقىرىلدى. سالتاناتتى جيىندا ءوڭىردىڭ ءار اۋدان-قالالارىنان كەلگەن، ءتۇرلى سالالاردا جەمىستى ەڭبەك ەتىپ جۇرگەن قاراپايىم ەڭبەك ادامدارىماراپاتتالدى, - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
بەيبىت يساباەۆ ءوزىنىڭ قۇتتىقتاۋىندا ايەل-انالاردىڭ قوعامداعى رولىنە توقتالىپ، مەرەكەلىك جىلى لەبىزىن جەتكىزدى:
- ايەل-انانىڭ اقىل-پاراساتى، وي ءورىسى، ىشكى سيپاتى، رۋحاني قۋاتى، ادامگەرشىلىك بولمىسى قاشاندا قوعامدى العا جەتەلەيتىن ايرىقشا كۇش. انا – تىرشىلىكتىڭ باستاۋى. مەيىرىمنىڭ قاينار كوزى. شاڭىراقتىڭ شامشىراعى. حاۋا انادان باستالعان وتباسىلىق قۇندىلىقتار، ۇرپاقتار ساباقتاستىعى، رۋحاني-ادامگەرشىلىك جولى بۇگىنگە دەيىن ۇزدىكسىز جالعاسىپ، مەملەكەت مۇددەسىنە، ەل بولاشاعىنا قىزمەت ەتىپ كەلەدى. سوندىقتان بۇگىنگى جاڭارعان، ادىلەتتى، اشىق قوعام قۇرۋداعى يگى باستامالاردىڭ باستى قولداۋشىسى وزدەرىڭىز ەكەنىن ريزاشىلىقپەن ايتامىز, - دەگەن بەيبىت يساباەۆ مەملەكەت قولداۋىمەن جەكە ءىسىن باستاپ، تابىستى ەڭبەك ەتىپكەلە جاتقان انالاردىڭ كوپكە ۇلگى تاجىريبەسىن اتاپ ءوتتى. مىسالى، اۋىلدىق جەرلەردەگى كاسىپكەرلىكتى دامىتۋعا باعىتتالعان «اۋىل اماناتى» جوباسىندا وبلىس بويىنشا وتكەن جىلى قولداۋ تاپقان 533 جوبانىڭ 44%-ى ايەلدەرگە تيەسىلى ەكەن. سولاردىڭ قاتارىندا اقسۋلىق قارلىعاش تۇمارباي، پانفيلوۆ اۋدانىنان مينۋرا قاسىمجانقىزى تىگىن تسەحىن اشىپ، ۇلتتىق ستيلدەگى ونىمدەر تىگۋدى قولعا الدى. مال ءوسىرۋدىڭ اۋىرتپالىعىنا قاراماستان، تالدىقورعاندىق گۇلزيرا تاۋىربەك وسى باعدارلامامەن ۇساق مال ساتىپ الىپ، جەكە شارۋاسىن تابىستى جۇرگىزىپ وتىر. سول سياقتى ءبىلىم بەرۋ، دەنساۋلىق ساقتاۋ، الەۋمەتتىك قورعاۋ سالالارىندا دا ەڭبەگىنىڭ جەمىسىن كورىپ جۇرگەن ۇزدىك ماماندار اتاپ ءوتىلدى.
- ارداقتى انالار! قۇرمەتتى ارۋلار! بارشاڭىزعا مىقتى دەنساۋلىق، تولايىم تابىس، قۋانىش پەن شاتتىق تىلەيمىن. ءاردايىم اسەمدىك پەن ادەمىلىكتىڭ، جىلىلىق پەن مەيىرىمنىڭ جارشىسى بولىپ، باقىتتى عۇمىر كەشىڭىزدەر. وتباسىلارىڭىزعا بەرەكە، ەلىمىزگە اماندىق بەرسىن! مەرەكە قۇتتى بولسىن! – دەگەن بەيبىت يساباەۆ ەڭبەك ەرى كۇلاش ايتجانوۆاعا، قازاقستاننىڭ حالىق ءارتىسى الماحان كەنجەبەكوۆاعا، «قامقور» ارناۋلى قىزمەتتەرگە مۇقتاج بالالاردى قولداۋ ورتالىعىنىڭ ديرەكتورى مەرۋەرت جيەنبەكوۆاعا، قازاقستاننىڭ 20 ميلليونىنشى ءسابيىنىڭ اناسى ديانا ازىمباەۆاعا جانە جەتىسۋ وبلىسىنىڭ قوعامدىق كەڭەسىنىڭ مۇشەسى رۋفينا ۋسانوۆاعا مەملەكەت باسشىسىنىڭ قۇتتىقتاۋ حاتىن تاپسىردى. سول سياقتى ون كوپ بالالى اناعا "التىن القا", "كۇمىس القا", تاعى جيىرماعا جۋىق نازىك جانعا وبلىس اكىمىنىڭ العىس حاتىن تاپسىردى. العىس حات العانداردىڭ بارلىعى اتاپ ايتقاندا، اۋىل شارۋاشىلىعى، تەمىر جول، پوشتا، ەنەرگەتيكا، دەنساۋلىق سياقتى ماڭىزدى سالالاردا ۇزاق جىلعى تاجىريبەسى بار حات تاسۋشى، قىزىلشاشى، تازالىقشى، اسپاز، ينجەنەر تەحنولوگ ت.ب قاراپايىم ەڭبەك ادامدارى.
مەرەكە كونتسەرتتىك باعدارلامامەن جالعاستى.
جەتىسۋ وبلىسى اكىمىنىڭ ءباسپاسوز قىزمەتى.
