جەتىسۋ وبلىسى قۇرىلعاننان بەرى 23 جاڭا كاسىپورىن ىسكە قوسىلىپ، جۇمىس ىستەپ تۇرعان 5-ءى كەڭەيتىلگەن، 759 جاڭا جۇمىس ورىندارى اشىلعان. ال بيىل قۇنى 39 ملرد. تەڭگە بولاتىن 12 كاسىپورىن ىسكە قوسىلىپ، 500-دەن استام جۇمىس ورنى اشىلادى. بۇل جايلى بۇگىن جۋرناليستەرگە جەتىسۋ وبلىسىنىڭ اكىمى بەيبىت يساباەۆ استانا قالاسىندا وتكەن بريفينگىدە ايتىپ بەردى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
بايانداماشىنىڭ ايتۋىنشا، وڭىردە ونەركاسىپ ءوندىرىسى كولەمىندەگى وڭدەۋ سەكتورىنىڭ ۇلەسى 80%-عا جەتكەن. وبلىستا نەگىزگىنەن اشىتقى (ۋىت), ەلەكترلى اككۋمۋلياتورلار، جوعارى ۆولتتى ەلەكتر تاراتۋ جەلىلەرىنە ارنالعان تەمىر بەتوندى جانە مەتالل تىرەكتەر وندىرىلەدى. بيىل 12 جاڭا كاسىپورىن پايدالانۋعا بەرىلەدى. سونىڭ ىرىلەرى – كەراميكالىق پليتالار شىعاراتىن «الماز كەراميكس» كاسىپورنى، كۇن پانەلدەرىن شىعاراتىن «مايامي سولار» كاسىپورنى جانە «EcoWattAKA» كومپانياسىنىڭ جەل ەلەكتر ستانسىسى.
ال «قورعاس – شىعىس قاقپاسى» ارنايى ەكونوميكالىق ايماعى مەن «قورعاس» حشىو – وبلىستاعى دامۋ نۇكتەسىنىڭ ءبىرى. مۇندا قازىر 2030 جىلعا دەيىن جالپى ينۆەستيتسيا كولەمى 622 ملرد.تەڭگە بولاتىن 52 جوبانى ىسكە اسىرۋ جوسپارلانۋدا.
- تاۋ-كەن سالاسىن دامىتۋ شەڭبەرىندە قۇنى 1,3 ترلن. تەڭگە بولاتىن، 2 مىڭنان استام جۇمىس ورنىن اشاتىن مەتاللۋرگيا كومبيناتىنىڭ قۇرىلىسى جۇرگىزىلە باستاعان. ونىڭ قۋاتى جىلىنا 860 مىڭ مىس كونتسەنتراتىن وندىرۋگە جەتەدى. قازىرگى كەزدە قۇرال-جابدىقتار مەن تاۋارلاردى ساقتايتىن قويمالار مەن باسقا دا تەحنيكالىق عيماراتتار سالىنىپ ءبىتتى. كومبيناتتىڭ قۇرىلىسى 2025 جىلى باستالىپ، 2027 جىلى اياقتالادى دەپ جوسپارلانعان، - دەدى سپيكەر.
جالپى وبلىستىڭ 2030 جىلعا دەيىنگى ينۆەستيتسيالىق پورتفەلىنە قۇنى 2,2 ترلن. تەڭگە بولاتىن، 9 مىڭنان استام جۇمىس ورنىن قۇراتىن 184 جوبا ەنگىزىلگەن.
جەتىسۋ وبلىسى اكىمىنىڭ ءباسپاسوز قىزمەتى
