سوڭعى كۇندەرى جەكەدە “وسى جايلى نە ايتاسىڭ، دوستارىڭ ەمەس پە” ءتارىزدى حابارلامالار تولىپ كەتتى. ەندەشە ءوز پىكىرىم وسى. مەيىرجان مەن مەيىرحاندى ون بەس جىلعا جۋىق ۋاقىت تانيمىن. ون جىلداي بىرگە تالاي جوبالاردى بىرگە جۇزەگە اسىردىق. دوس، باۋىر، ارىپتەس رەتىندە ايتارىم كوپ.
مەيىرحان دا، مەيىرجان دا دوسقا ادال، پەيىلى كەڭ، ەش ارام ويى جوق كوڭىلى اشىق جايدارى جىگىتتەر. ەكەۋى دە ۇلكەن وتباسىلى، كوپبالالى اكەلەر. قارجى-قاراجاتقا مۇقتاج جاندار دا ەمەس. شىعارماشىلىقپەن اينالىسىپ-اق شارۋاشىلىعىن دومالاتىپ وتىرعان جىگىتتەر. نەگە بۇلاي بولىپ قالعانى مەنىڭ دە ميىما كىرىپ شىقپايدى. اتتەڭ وسىنداي جاعدايعا دۋشار بولىپ قالدى.
بالكىم وزدەرى دە الدانىپ قالدى ما ەكەن؟ قانشاما جىل ارالاس-قۇرالاس، دوس، ارىپتەس رەتىندە مەيىرحان مەن مەيىرجان وسىنداي قارا پيعىلمەن دۇنيە تاپتى دەگەنگە سەنە المايمىن. بۇل ىسكە ءبىر ەكسپەرتتىك باعا بەرۋدەن نەمەسە بىرەۋدى ايىپتاۋدان اۋلاقپىن. سەبەبى بۇل ءىستىڭ ەگجەي-تەگجەيى كوپ. سوندىقتان عايباتتاۋعا، سىرتتان تون پىشە سالۋعا سىزدەر دە اسىقپاڭىز، دوستار. تەرگەۋ بولعان سوڭ، سىرت كوزگە بەلگىلى اقپارات پەن ءىستىڭ بىزگە ءالى بەلگىسىز تۇستارى دا بارى انىق. سوندىقتان سوتتىڭ ءادىل وتۋىنە ءۇمىتىمىز مول. بار ايتارىم، مەن بىلەتىن مەيىرحان مەن مەيىرجان مۇنداي ولقىلىققا بارماس ەدى. ەش سەنبەيمىن! سەنە المايمىن.
سوندىقتان ءبىر قاتەلىك ورىن العان بولار دەپ ويلايمىن. مەن زاڭگەر ەمەسپىن. كوپ دەتالدەرىن بىلمەيتىن دە شىعارمىن. دەگەنمەن سوتتىڭ ءادىل بولۋىن قالايمىن. بۇل ءىس بارلىق تاراپتار ءۇشىن وڭ شەشىلىپ جاقسىلىقپەن بىتەدى دەپ ۇمىتتەنەمىن. بارلىعى جاقسى بولادى!
مارات ورالعازين
