Астанада полицейлер азық-түлік ұрлады деген күдікке ілінген кәмелетке толмаған қызды ұстады, деп хабарлайды "Адырна" ұлттық порталы Polisia.kz сайтына сілтеме жасап.
Жасөспірім супермаркетте ұрлық жасауды ойлап, кассадан азық-түлік өнімдерін алып өткен. Полицейлердің күдігі бейнебақылау камераларының жазбаларын қарағаннан кейін расталды. Дүкенге келтірілген шығын 250 мың теңгеден астам деп бағаланды.
Криминалдық полиция қызметкерлері күдіктінің жеке басы мен тұрғылықты мекенжайын анықтады. Ол 17 жастағы қыз болып шықты. Жасаған ісін мойындады.
Кәмелетке толмаған қыздың айтуынша, түнде тәулік бойы жұмыс істейтін дүкендердің біріне кіріп, сатып алушы кейпіне енген. Қызметкерлер оған назар аудармағанын пайдаланып, сөрелерден азық-түлік өнімдерін ұрлап кеткен.
Ұрлық фактісі бойынша қылмыстық іс тіркелді. Бұрын да полицейлер бұл жас астаналықты осындай қылмыстар жасағаны үшін ұстағаны анықталды, бірақ оның кәмелетке толмағанына байланысты ешқайда кетпеу туралы қолхатпен босатқан.
