Алматының Орталық стадионының басшысы "Астана" - "Челси" матчы алдында трибуналардың уақытылы тазаланбауына байланысты қызметінен босатылды, деп хабарлайды “Адырна” ұлттық порталы.
Ақпаратқа сәйкес, «Астана» мен «Челси» футбол клубтары арасындағы ойынды тамашалауға барған жанкүйерлер қар басқан орындақтарға қатысты шағым айтып, наразылық білдірген.
«Алматы қаласы Орталық стадионының батыс секторындағы алты қатардағы орындықтардың (орталық стадиондағы жалпы орын санының 2,7%) арасындағы қардың уақытылы тазаланбауына байланысты туындаған қолайсыздықтар үшін жанкүйерлерден кешірім сұраймыз. Алдағы уақытта мұндай оқиғаларды болдырмау үшін тексеру жүргізіледі. Орталық стадион нысанының меңгерушісі Бауыржан Жұмажанов қызметінен босатылды», – делінген Алматы қаласының спорт нысандары дирекциясының хабарламасында.
