Шәкен Аймановтың 1964 жылы түсірілген әйгілі «Алдар көсе» фильмінің реставрацияланған нұсқасы 2024 жылғы «Еуразия» кинофестивалінің ерекше оқиғасы болады. Бұл туралы фестивальдің бағдарламалық директоры Диана Әшімова мәлімдеді, деп хабарлайды "Адырна" ұлттық порталы.
Әшімова фестивальдің ең басты шараларының бірі ретінде ұлттық мәдениеттің құрметі ретінде ұсынылатын туындының жаңартылған нұсқасын көрсететінін атап өтті. Бұл қадам қазақ кинематографиясының байлығын жаңа сапада танытуға бағытталған.
«Еуразия» кинофестивалінің басты мақсаттарының бірі – мәдени байланысты нығайту, қазақ киносының жаңа есімдерін ашу және ұлттық мұраны дәріптеу. Фестивальдің бағдарламасында «Алдар көсе» фильмі ерекше орын алады, себебі ол тек кино өнерінің дамуы ғана емес, сонымен бірге ұлттық құндылықтарымызды сақтап, кейінгі ұрпаққа жеткізу жолындағы маңызды қадам болып табылады.
Халықаралық «Еуразия» кинофестивалі 2024 жылдың 24-30 қараша аралығында өтеді.
