Өзбекстанда жалғызбасты қарттар мен мүгедектігі бар адамдар қоғамдық көлікте тегін жүре алады. Бүгін, 15 тамызда Олий Мажлис Сенаты заңнамаға енгізілген түзетулерді мақұлдады, деп хабарлайды «Адырна» тілшісі.
Сондай-ақ олар жоғалған немесе жарамдылық мерзімі өтіп кеткен жеке куәліктер мен биометриялық паспортты ауыстыру кезінде мемлекеттік баж төлеу салығынан босатылады.
Парламенттің жоғарғы палатасы елде «адам мүддесі бәрінен жоғары»стратегиясы шеңберінде ауқымды реформалар жүргізіліп жатқанын атап өтті.
Еске салайық, бұған дейін Өзбекстан президенті Шавкат Мирзиеев тұрғын үй-коммуналдық шаруашылық пен азық-түлікке ай сайынғы өтемақының орнына жалғызбасты қарттар мен мүгедектерге ең төменгі тұтыну шығысы көлемінде ай сайынғы материалдық көмек көрсетілетінін мәлімдеген еді.
