Белгілі құқық қорғаушы Маргарита Өскембаева 17 маусымда дүниеден өтті, деп хабарлайды "Адырна" ұлттық порталы.
Маргарита Өскембаева - Тең құқықтар мен тең мүмкіндіктер институтының негізін қалаушы, әйелдер мен балалар құқықтары үшін күрескен күрескер әйел, Қазақстандағы алғашқы феминистердің бірі. Ол психолог болып жұмыс істеп, ғылыми зерттеулер жүргізді. Көзі тіріде тұрмыстық зорлық-зомбылық құрбандарына арналған «Араша» баспанасын басқарды. Одан бөлек, Қазақстан Президенті жанындағы әйелдер істері және отбасылық-демографиялық саясат жөніндегі ұлттық комиссияның да мүшесі болған.
Маргарита Өскембаеваның қазасы туралы депутат Ирина Смирнова бөлісті.
«Ұзақ уақыт бойы ол ешбір қолдаусыз, ақысыз, грантсыз, мектеп пен балабақшада психолог болып жұмыс істеп, қоғамдық қызмет атқарды. Содан кейін ол әйелдерге арналған дағдарыс орталығын ұйымдастыру үшін өте аз мемлекеттік грант алды. Ол бұны жүрегімен жасады. Әйелдерге медициналық көмек, құқықтық қолдау және психологиялық қолдау көрсету мүмкіндігін қамтамасыз етті. Ол әйелдердің мамандық алуы үшін және онымен бірге өзіне деген сенімділігі үшін қолынан келгенше көмек берді. Ол орталыққа анасымен бірге түскен балаларға да қамқорлық жасады. Оларды мектеп пен балабақшаға орналастырды»,– деп депутат Ирина Смирнова естеліктерімен бөлісті.
Марқұмды жерлеу рәсімі 18 маусым күні өзінің туған ауылында өтеді.
