"SEN KEMPIRQOSAQTY EShQAShAN KÓRE ALMAISYŃ, EGER TÓMEN QARAP JÚRER BOLSAŃ..."
Vevedegi áıgili Charlz Chaplın mýzeıiniń kire berisinde aıqyndap jazylǵan osy sózge birden kózim túsken edi...
Jalpy Ch.Chaplın týraly estelikter de, oqıǵalar da kóp tarıhta qalǵan. Týma talanttyń naq ózi. Tekten daryǵan. Ata-anasy da mádenıet pen ónerdiń bel ortasynda júrgen... Iá, júrgen... Tek keıin Charlz Chaplın qıyndyqty kóp kórdi. Baýyry ekeýi.
Bul talanttyń tanymal bolýy jolyndaǵy kedergilerdiń biri edi.
Únsiz, sıýjeti tereń, adal hám qýaqy, zııaly, biraq qýtykesh, eń bastysy, eshkimge zııany joq, jaqsylyqqa ǵana qushtar qaıyrshy keıipkerdiń rolinen ol bir sátte de ajyramady, alystamady. Keıin dybysty kınolar túsirile bastaǵanda da, ol jańa úderiske qosylyp, qaıyrshynyń "daýsyn shyǵarmady". Ol óz isine adal bolyp qaldy. Taıaǵy men shlıapasy Chaplınniń ımıdjin ǵana emes, kórermender sanasyna sol ózi ómir súrgen ortany jetkizdi. Áýen men qımyldy sóılete otyryp, kórermenge jol tapty.
Vevedegi Chaplın mýzeıine álemniń túkpir-túkpirinen halyq tolassyz aǵylady. Sebebi, ǵasyr ótse de, halyq kóńili saf talantty tanıdy, umytpaıdy.
Men de ChAPLINDI izdep bardym. Tutynǵan buıymdarymen, turǵan mekenimen, tarıhymen, ómirimen, talantymen jaqyn tanystym. Áıtse de, ońdy-soldy sýretke túsip, kassadan ótkende qolyma ustatqan "Chaplın" shokoladyn jeý emes edi maqsatym... Meni onyń óz ónerine degen adaldyǵy, súıispenshiligi tánti etti.
Osy joly da únemi izdep júretin "mýzeı mádenıetine" zer saldym. Kirgennen bastap, shyqqanǵa deıin ár qyrynan qarap, barynsha sýretke túsirdim, qoıyn dápterime jazyp aldym. Sońynda ǵoı, úıiniń toǵaı jaqqa alyp baratyn esiginiń aldynda demimdi alyp, oılanyp otyrǵanym.
Óz kásibine adaldyq pen tynymsyz eńbek Chaplınniń álemdi ózgertýine, ózin ózgertýine múmkindik ákeldi.
Chaplın álemine tabynýshylar qandaı tehnologııalar ǵasyry kelse de, tolastamaıdy-aý, sirá...), sebebi ol álemdi ózgertýge úles qosty ǵoı. Onyń álemin ózgertý qıyn bolar...
