Bıyl Qazaqstannyń mádenıet jáne óner salasyna erekshe úles qosqan Saýyq Másiǵutqyzy Jaqanova 80 jas mereıtoıyn atap ótedi. Osyǵan oraı, 2025 jylǵy 15 aqpan kúni saǵat 14:00-de Qazaqstan Respýblıkasynyń Ulttyq kitaphanasynda onyń qurmetine arnalǵan «Sahara sandýǵashy» atty kitaptyń tanystyrylymy ótedi.
Saýyq Jaqanova 1945 jyly 11 aqpanda Qaraǵandy oblysy, Shet aýdany, Erkindik aýylynda dúnıege kelgen. Ol S.M. Kırov atyndaǵy Qazaq memlekettik ýnıversıtetiniń fılologııa fakýltetin 1966 jyly bitirgen. Sol jyly eńbek jolyn Qazaq radıosynyń dıktory retinde bastap, onda 2002 jylǵa deıin úzdiksiz qyzmet etti.
Kásibı mansabynda Saýyq Másiǵutqyzy óziniń erekshe daýysymen halyq júregine jol taýyp, Qazaq radıosynyń betke ustar dıktorlarynyń birine aınaldy. Onyń shyǵarmashylyǵy men eńbegi joǵary baǵalanyp, 1985 jyly «Qurmet belgisi» ordenimen marapattaldy, al 1995 jyly «Qazaqstan Respýblıkasynyń Eńbek sińirgen ártisi» ataǵyna ıe boldy.
Qazaqstan Respýblıkasy Prezıdentiniń 2021 jylǵy 2 jeltoqsandaǵy Jarlyǵymen "Qazaqstannyń eńbek sińirgen qaıratkeri" qurmetti ataǵy berildi.
«Sahara sandýǵashy» kitaby – rýhanı mura
Mereıtoı qarsańynda jaryq kórgen «Sahara sandýǵashy» kitaby Saýyq Jaqanovanyń ómiri men shyǵarmashylyǵyn baıandaıdy. Bul kitapta onyń ómir joly, radıodaǵy qyzmeti, ustazdyq eńbegi jáne Qazaqstan mádenıetin damytýǵa qosqan úlesi qamtylǵan.
Saýyq Jaqanovanyń 80 jyldyq mereıtoıy – qazaq rýhanııaty men mádenıetiniń taǵy bir jarqyn beti.
"Sahara sandýǵashy" atty kitaptyń qurastyrýshylary - jýrnalıst Tańsulý Aldabergenqyzy men shákirti, radıojýrnalıst Jazıra Amantaıqyzy.
Kitap "Atamura" baspasynan jaryqqa shyǵady.
