13-19 jeltoqsan aralyǵynda Taıland astanasy Bangkok pen Pattaııa qalalarynda álem aqyndarynyń 7-shi Boao halyqaralyq poezııa festıvali ótti, dep habarlaıdy “Adyrna” ulttyq portaly.
Álemdik jyr toıyna jer sharynyń túkpir-túkpirinen aqyndar keldi. Al festıvalge qazaq aqyny retinde Qazaqstannyń eńbek sińirgen qaıratkeri, qytaıtanýshy-ǵalym, belgili aqyn, aýdarmashy Dúken Másimhanuly arnaıy shaqyryldy.
«Óz basym bul jolǵy álem aqyndarynyń kezdesýi óte jemisti boldy dep esepteımin.
Sebebi, álemniń ár túkpirinen kelgen aqyndar bir-birimen jaqyn tanysyp, bir-birimen syrlasyp, pikir almasyp, bir-biriniń shyǵarmashylyǵynan bastap, bir-biriniń eliniń áleýmettik, rýhanı salalaryna da barynsha den qoıdy”, deıdi Dúken Másimhanuly.
Álem aqyndarynyń bas qosýynyń eń úlken jeńisi men jemisi - Halyqaralyq aqyndar PEN-klýbynyń (Poets international PEN club - 國際詩人筆會 - نادي القلم الدولي للشعراء) qurylýy boldy.
Jergilikti BAQ ókilderi men festıvalǵa qatysýshylar bul uıymnyń qurylýyn adamzat balasynyń rýhanı ómirindegi eleýli oqıǵa dep syıpattady.
“Atalǵan uıym bolashaqta adamzat balasyn bir-birine jaqyndatyp, adamı rýhanı týystyq qatynasty tereńdetýge ıgi yqpal etetin uıym bolmaq.
Óıtkeni adamzattyń bir ǵana ortaq Otany bar, ol – jershary. Sondaı-aq adam balasynyń eń negizgi tildik qubylystary (kúlý, jylaý, qýaný, muńaıý...) bir-birinmen múlde uqsaıdy.
Sondaı-aq adamı qundylyqtar (shapqynshylyq, qatygezdik, alaıaqtyq, urlyq, zorlyq-zombylyq, ádiletsizdik, aldamkóstik, nadandyq, paraqorlyq…t.b. jek kórý; Izgilikti, tazalyqty, ádilettilikti, teńdikti, meıirimdilikti, beıbitshilikti, teńdikti súıý) barlyq halyqtarda óte uqsas ekeni belgili. Sondyqtan adamzattyń rýhanı kógershini sanalatyn aqyndar osy klýb arqyly adamzatty jaqyndastyrýǵa laıyqty úles qosady dep oılaımyn”, dedi Dúken Másimhanuly.
Bangkokta ótken tuńǵysh quryltaıda ashyq daýys berý arqyly klýbtyń tóraǵasy, atqarýshy dırektori jáne olardyń orynbasarlary saılandy. Sonymen qatar, klýbtyń basqarma músheligine álemniń ár elinen kelgen 15 aqyn saılandy.
Al Qazaqstannyń atynan Halyqaralyq aqyndar PEN-klýbynyń basqarma múshesi bolyp Dúken Másimhanuly saılandy.
Sondaı-aq, festıval aıasynda álemniń ár shalǵaıynan kelgen 20-shaqty aqyn 2024 jyly “Álem poezııasy” (WORLD POETRY - 世界詩歌） jýrnalyna shyqqan óleńderi boıynsha marapatqa ıe boldy.
Aıta keteıik, Halyqaralyq aqyndar PEN-klýbynyń shtab páberi - Avstralııanyń Sıdneı qalasynda ornalasady. Aldaǵy jyly klýbtyń II quryltaıy Avstralııanyń Sıdneı qalasynda ótedi.
