13-19 جەلتوقسان ارالىعىندا تايلاند استاناسى بانگكوك پەن پاتتايا قالالارىندا الەم اقىندارىنىڭ 7-ءشى بواو حالىقارالىق پوەزيا فەستيۆالى ءوتتى، دەپ حابارلايدى “ادىرنا” ۇلتتىق پورتالى.
الەمدىك جىر تويىنا جەر شارىنىڭ تۇكپىر-تۇكپىرىنەن اقىندار كەلدى. ال فەستيۆالگە قازاق اقىنى رەتىندە قازاقستاننىڭ ەڭبەك سىڭىرگەن قايراتكەرى، قىتايتانۋشى-عالىم، بەلگىلى اقىن، اۋدارماشى دۇكەن ءماسىمحانۇلى ارنايى شاقىرىلدى.
«ءوز باسىم بۇل جولعى الەم اقىندارىنىڭ كەزدەسۋى وتە جەمىستى بولدى دەپ ەسەپتەيمىن.
سەبەبى، الەمنىڭ ءار تۇكپىرىنەن كەلگەن اقىندار ءبىر-بىرىمەن جاقىن تانىسىپ، ءبىر-بىرىمەن سىرلاسىپ، پىكىر الماسىپ، ءبىر-ءبىرىنىڭ شىعارماشىلىعىنان باستاپ، ءبىر-ءبىرىنىڭ ەلىنىڭ الەۋمەتتىك، رۋحاني سالالارىنا دا بارىنشا دەن قويدى”، دەيدى دۇكەن ءماسىمحانۇلى.
الەم اقىندارىنىڭ باس قوسۋىنىڭ ەڭ ۇلكەن جەڭىسى مەن جەمىسى - حالىقارالىق اقىندار پەن-كلۋبىنىڭ (Poets international PEN club - 國際詩人筆會 - نادي القلم الدولي للشعراء) قۇرىلۋى بولدى.
جەرگىلىكتى باق وكىلدەرى مەن فەستيۆالعا قاتىسۋشىلار بۇل ۇيىمنىڭ قۇرىلۋىن ادامزات بالاسىنىڭ رۋحاني ومىرىندەگى ەلەۋلى وقيعا دەپ سىيپاتتادى.
“اتالعان ۇيىم بولاشاقتا ادامزات بالاسىن ءبىر-بىرىنە جاقىنداتىپ، ادامي رۋحاني تۋىستىق قاتىناستى تەرەڭدەتۋگە يگى ىقپال ەتەتىن ۇيىم بولماق.
ويتكەنى ادامزاتتىڭ ءبىر عانا ورتاق وتانى بار، ول – جەرشارى. سونداي-اق ادام بالاسىنىڭ ەڭ نەگىزگى تىلدىك قۇبىلىستارى (كۇلۋ، جىلاۋ، قۋانۋ، مۇڭايۋ...) ءبىر-بىرىنمەن مۇلدە ۇقسايدى.
سونداي-اق ادامي قۇندىلىقتار (شاپقىنشىلىق، قاتىگەزدىك، الاياقتىق، ۇرلىق، زورلىق-زومبىلىق، ادىلەتسىزدىك، الدامكوستىك، ناداندىق، پاراقورلىق…ت.ب. جەك كورۋ; ىزگىلىكتى، تازالىقتى، ادىلەتتىلىكتى، تەڭدىكتى، مەيىرىمدىلىكتى، بەيبىتشىلىكتى، تەڭدىكتى سۇيۋ) بارلىق حالىقتاردا وتە ۇقساس ەكەنى بەلگىلى. سوندىقتان ادامزاتتىڭ رۋحاني كوگەرشىنى سانالاتىن اقىندار وسى كلۋب ارقىلى ادامزاتتى جاقىنداستىرۋعا لايىقتى ۇلەس قوسادى دەپ ويلايمىن”، دەدى دۇكەن ءماسىمحانۇلى.
بانگكوكتا وتكەن تۇڭعىش قۇرىلتايدا اشىق داۋىس بەرۋ ارقىلى كلۋبتىڭ توراعاسى، اتقارۋشى ديرەكتورى جانە ولاردىڭ ورىنباسارلارى سايلاندى. سونىمەن قاتار، كلۋبتىڭ باسقارما مۇشەلىگىنە الەمنىڭ ءار ەلىنەن كەلگەن 15 اقىن سايلاندى.
ال قازاقستاننىڭ اتىنان حالىقارالىق اقىندار پەن-كلۋبىنىڭ باسقارما مۇشەسى بولىپ دۇكەن ءماسىمحانۇلى سايلاندى.
سونداي-اق، فەستيۆال اياسىندا الەمنىڭ ءار شالعايىنان كەلگەن 20-شاقتى اقىن 2024 جىلى “الەم پوەزياسى” (WORLD POETRY - 世界詩歌） جۋرنالىنا شىققان ولەڭدەرى بويىنشا ماراپاتقا يە بولدى.
ايتا كەتەيىك، حالىقارالىق اقىندار پەن-كلۋبىنىڭ شتاب پابەرى - اۆستراليانىڭ سيدنەي قالاسىندا ورنالاسادى. الداعى جىلى كلۋبتىڭ ءىى قۇرىلتايى اۆستراليانىڭ سيدنەي قالاسىندا وتەدى.
