Qazaqstan Ulttyq banki 2024 jyldyń 25 jeltoqsanynan bastap jańa dızaındaǵy 2000 teńgelik banknottardy aınalymǵa shyǵarady, dep habarlaıdy "Adyrna" ulttyq portaly.
Ulttyq banktiń málimetinshe, bul – «Saq stıli» serııasyndaǵy úshinshi banknot.
«Ol dástúrli qazaq oıý-órneginiń bastaýyna aınalǵan «Saq stıli» elementterine negizdelgen jáne kóshpeli mádenıetten qazirgi zamanǵy Qazaqstanǵa deıingi el murasyn beıneleıdi», – dep atap ótti Ulttyq bank.
Atalǵan banknottar jappaı aınalymǵa 2025 jyldyń ekinshi toqsanynda túsedi. Sebebi olardy eldiń barlyq óńirlerine jetkizý jáne bankomattar, termınaldar, kassalyq tehnıkaǵa beıimdeý úshin qosymsha ýaqyt qajet.
«Jańa dızaındaǵy 2000 teńgelik banknottar 2024 jyldyń 25 jeltoqsanynan bastap aınalymǵa engizilip, 18 aı ishinde 2012 jylǵy úlgidegi banknottardy (eski úlgidegi banknottar) birtindep aýystyrady. Osylaısha, eski úlgidegi banknottar 1,5 jyl boıy birtindep aınalymnan alynatyn bolady. Bul kezeńde turǵyndarǵa eski úlgidegi banknottardy ekinshi deńgeıli bankterde nemese Ulttyq banktiń fılıaldarynda jańasyna ózdiginen aýystyrýdyń qajeti joq», – dep túsindirdi bank ókilderi.
Eski jáne jańa úlgidegi banknottardyń paralleldi aınalymy 2024 jyldyń 25 jeltoqsanynan 2026 jyldyń 24 maýsymyna deıin jalǵasady.
Paralleldi aınalym kezeńi aıaqtalǵannan keıin, ıaǵnı 2026 jyldyń 25 maýsymynan bastap, barlyq bankter men Qazposhta eski úlgidegi banknottardy jańa úlgidegi banknottarǵa úsh jyl ishinde – 2029 jyldyń 25 maýsymyna deıin aýystyrady.
Ulttyq banktiń fılıaldary eski úlgidegi banknottardy merzimsiz qabyldaıdy.
Qoldanystaǵy zańdy tólem quraly bolyp tabylatyn banknottar men monetalardy qabyldaýdan bas tartý Qazaqstan Respýblıkasynyń Ákimshilik quqyq buzýshylyq týraly kodeksine sáıkes ákimshilik quqyq buzýshylyq bolyp sanalady, dep eske saldy Ulttyq bank.
