Muhtar Shahanovpen shyndyq bıigindegi kezdesý

105
Adyrna.kz Telegram

Astana qalasyndaǵy “Sun Study” oqý ortalyǵynda belgili aqyn, jazýshy, qoǵam qaıratkeri Muhtar Shahanovpen kezdesý ótti. Is-shara táýelsizdik merekesi aıasynda búldirshinderge shyǵarmashylyǵyn tanytý jáne ómir jolyn ónege etý maqsatynda uıymdastyrylyp, qala turǵyndarynyń basyn qosty.

Kesh Muhtar Shahanovty saltanatty túrde kútip alýmen bastaldy. Qonaqtar jaıǵasqan soń Táýelsizdik kúnine oraı barlyǵy ornynan turyp, júrekterin ustap ánuran oryndady. Keshtiń shymyldyǵyn jýrnalıst, termeshi Amangeldi Seıthan dombyramen tógiltip turyp arnaý aıtty. Arnaýda Shahanovtyń shyǵarmashylyq jetistikteri, eren eńbegi, erlikteri tolyq qamtylyp, portrettik beınesi aıqyndalǵandaı áser qaldyrdy. Aqynnyń ádebıettegi orny men táýelsizdik jolyndaǵy eńbegine qurmettiń bir kórinisi retinde shyǵarmalarynan úzindiler oqyldy.


Nebári 12 jastaǵy jas aqyn Nurasyl Jasulanuly ózi jazǵan“Táýelsizdik”, “Týǵan til”, “Álıhan Bókeıhanǵa arnaý” atty óleńderin oqyp, kópshilikti tań qaldyrdy. Jas aqyn bala uly aqynnyń rızashylyǵyna bólendi.
Jas aqyndar Qabıden Qýanyshbaıuly men Sarqytbek Nurdybek Muhtar Shahanovqa arnaý óleńderin oqyp, erekshe áser qaldyrdy. Sonymen qatar, “Alqa” oqý ortalyǵynyń muǵalimi Erkejan Qaıratqyzy men Astana qalasy #93 mekteptiń oqýshysy Alpys Omar Muhtar Shahanovtyń “Jigerlendirý” jáne Tólegen Aıbergenovtyń Muhtar Shahanovqa arnaǵan “Saǵynysh” óleńderin mánerlep oqydy. Olardyń oryndaýyndaǵy kórkem sóz óneri keshtiń rýhyn bıiktete tústi.

Ádebı keshte mýzyka óneri de nazardan tys qalǵan joq. Halyq kompozıtorlary, sal-seriler el men jer úshin kúreste aldyńǵy shepten tabylyp, sol úshin talaı qýǵyn kórgeni, ıtjekkenge aıdalǵany, abaqtyǵa qamalǵany, tipti atylyp oqqa ushqany kópke aıan. Táýelsizdik kúnindeı qasterli kúnde olardyń esimi atalyp, ánderi shyrqalyp, qurmet kórsetilýi zańdylyq qoı. Belgili ánshi Jasulan Naýryzbaıuly Úkili Ybyraıdyń “Gákký” ánin sheberlikpen shyrqasa, Sun Study oqý ortalyǵynyń ustazy Damır Erkinuly Muqaǵalı Maqataevtyń sózine jazylǵan Tursynǵazy Rahımovtyń “Qazaǵym-aı” ánin óte joǵary deńgeıde áýeletti.

Janbolat Shákimniń “Áke úkimi” shyǵarmasynan oqylǵan úzindi de kópshiliktiń júregin terbep, tereń oı saldy.

Kesh barysynda kelgen qonaqtar da top ishinen sýyrylyp shyǵyp, Muhtar Shahanovtyń óleńderin jarysa, jatqa oqydy. Qazaq halqynyń ataǵa degen qurmetin osyndaı sátter taǵy bir aıqyndap berdi.

Is-shara sońynda Muhtar Shahanovqa syı-sııapat usynylyp, aqyn óziniń aq batasyn berdi.
Sun Study oqý ortalyǵynyń Gúlfaırýz Myqtybekova bastaǵan ustazdary men oqýshylary Muhtar Shahanovtyń sózine jazylǵan ánderin áýelete shyrqap, is-sharany túıindedi.
Keshtiń mańyzy tek ádebıet pen ónerdi nasıhattaýda emes, ult rýhanııatyn, táýelsizdik jolyndaǵy kúresti dáripteýde. Muhtar Shahanovpen osyndaı áserli kezdesý jastarǵa shabyt syılap, elge, tilge degen súıispenshilikti odan ári arttyra tústi.

Pikirler