Belgili qazaqstandyq sportshy Serik Sápıev memlekettik qyzmetke qaıta oralady, dep habarlaıdy «Adyrna» ulttyq portaly.
Bul aqparat aımaqtyq sport basqarmalary basshylaryn taǵaıyndaý jónindegi komıssııanyń otyrysynda belgili boldy.
Qazaqstannyń Týrızm jáne sport mınıstrliginiń baspasóz qyzmetiniń málimdeýinshe, otyrys Astanada mınıstr Erbol Myrzabosynovtyń tóraǵalyǵymen ótti. Onda Qaraǵandy jáne Pavlodar oblystarynyń dene shynyqtyrý jáne sport basqarmalarynyń basshylyq qyzmetterine úmitkerler qaraldy.
Komıssııa Londondaǵy Olımpıada oıyndarynyń chempıony, boksshy Serik Sápıevtiń Qaraǵandy oblysy dene shynyqtyrý jáne sport basqarmasynyń basshysy laýazymyna kandıdatýrasyn maquldady. Al Pavlodar oblysynda bul qyzmetti Sport jáne dene shynyqtyrý isteri komıteti tóraǵasynyń orynbasary Azamat Imashev basqarady.
Otyrysta komıssııa músheleri úmitkerlerdiń kásibı tájirıbesi, óńirdegi sportty damytý josparlary, sondaı-aq sport ǵylymy men menedjmenti salasyndaǵy bilimderi týraly suraqtar qoıdy.
«Memleket basshysy XXXIII jazǵy Olımpıada oıyndarynyń júldegerlerimen kezdesý barysynda óńirler sporttyń qandaı túrlerin damytý kerektigin ózderi sheship jatqanyna nazar aýdardy. Osyǵan baılanysty Prezıdent úkimetke sport salasyndaǵy basqarý vertıkalin barlyq deńgeıde qaıta qalpyna keltirýdi tapsyrdy. Endi oblystyq sport basqarmalarynyń basshylyq qyzmetterine kandıdattardy Týrızm jáne sport mınıstrligi janyndaǵy komıssııa bekitedi», – dedi Erbol Myrzabosynov.
Kandıdatýralardy ákimdikter usynady. Mınıstrlik janyndaǵy komıssııanyń oń qorytyndysyn alǵandar ǵana taǵaıyndalady.
