بەلگىلى قازاقستاندىق سپورتشى سەرىك ساپيەۆ مەملەكەتتىك قىزمەتكە قايتا ورالادى، دەپ حابارلايدى «ادىرنا» ۇلتتىق پورتالى.
بۇل اقپارات ايماقتىق سپورت باسقارمالارى باسشىلارىن تاعايىنداۋ جونىندەگى كوميسسيانىڭ وتىرىسىندا بەلگىلى بولدى.
قازاقستاننىڭ تۋريزم جانە سپورت مينيسترلىگىنىڭ ءباسپاسوز قىزمەتىنىڭ مالىمدەۋىنشە، وتىرىس استانادا مينيستر ەربول مىرزابوسىنوۆتىڭ توراعالىعىمەن ءوتتى. وندا قاراعاندى جانە پاۆلودار وبلىستارىنىڭ دەنە شىنىقتىرۋ جانە سپورت باسقارمالارىنىڭ باسشىلىق قىزمەتتەرىنە ۇمىتكەرلەر قارالدى.
كوميسسيا لوندونداعى وليمپيادا ويىندارىنىڭ چەمپيونى، بوكسشى سەرىك ساپيەۆتىڭ قاراعاندى وبلىسى دەنە شىنىقتىرۋ جانە سپورت باسقارماسىنىڭ باسشىسى لاۋازىمىنا كانديداتۋراسىن ماقۇلدادى. ال پاۆلودار وبلىسىندا بۇل قىزمەتتى سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى ازامات يماشەۆ باسقارادى.
وتىرىستا كوميسسيا مۇشەلەرى ۇمىتكەرلەردىڭ كاسىبي تاجىريبەسى، وڭىردەگى سپورتتى دامىتۋ جوسپارلارى، سونداي-اق سپورت عىلىمى مەن مەنەدجمەنتى سالاسىنداعى بىلىمدەرى تۋرالى سۇراقتار قويدى.
«مەملەكەت باسشىسى XXXIII جازعى وليمپيادا ويىندارىنىڭ جۇلدەگەرلەرىمەن كەزدەسۋ بارىسىندا وڭىرلەر سپورتتىڭ قانداي تۇرلەرىن دامىتۋ كەرەكتىگىن وزدەرى شەشىپ جاتقانىنا نازار اۋداردى. وسىعان بايلانىستى پرەزيدەنت ۇكىمەتكە سپورت سالاسىنداعى باسقارۋ ۆەرتيكالىن بارلىق دەڭگەيدە قايتا قالپىنا كەلتىرۋدى تاپسىردى. ەندى وبلىستىق سپورت باسقارمالارىنىڭ باسشىلىق قىزمەتتەرىنە كانديداتتاردى تۋريزم جانە سپورت مينيسترلىگى جانىنداعى كوميسسيا بەكىتەدى»، – دەدى ەربول مىرزابوسىنوۆ.
كانديداتۋرالاردى اكىمدىكتەر ۇسىنادى. مينيسترلىك جانىنداعى كوميسسيانىڭ وڭ قورىتىندىسىن العاندار عانا تاعايىندالادى.
