Áleýmettik jelide «Shyńjań túrmesinde qamaýda otyrǵan qazaq zııalylary» degen tizim jarııalandy. Ustalyp ketkenderdiń tiziminde Qytaıdyń Shyńjań óńirinde ártúrli salada qyzmet etken ulty qazaq azamattardyń aty-jóni jáne burynǵy qyzmeti kórsetilgen, dep habarlaıdy «Adyrna» tilshisi «Jas Alash» gazetine silteme jasap.
Qamaýda otyrǵandar:
Qanat Erejep, «Shyńjań» televızııasy basshysynyń burynǵy orynbasary, qazir zeınetker.
Asan Ábeý, «Shyńjań halyq baspasy» bas redaktorynyń burynǵy orynbasary, zeınetker.
Álimtaı Bıádil, Úrimjidegi №36 orta mekteptiń matematıka muǵalimi.
Qasym Oqanuly, Shyńjań Uıǵyr avtonomııalyq ólkesiniń syrtqy ister basqarmasy basshysynyń orynbasary bolǵan.
Jeńis Shaıh, jýrnalıst, «Shyńjań» gazetinde biraz jyl qyzmet istegen. Keıin Shynjań ólkelik PK-nyń úgit-nasıhat bóliminde istegen.
Nurjaqan Ónerhan, Úrimji qalasyndaǵy jalǵyz qazaq tildi orta mektep – 36 orta mektebiniń oqytýshysy;
Rasimııat Qabylqaquly, «Shyńjań» telearnasynyń qaramaǵyndaǵy balalar telearnasynda senarıst bolyp jumys istegen.
Ońalǵan Múlikuly, «Shyńjań» gazetiniń beldi aýdarmashysy.
Jánibek Jáýdátuly, «Shyńjań» gazetinde tilshi, aýdarmashy bolyp jumys istegen.
Murat Ybyraıuly, aqyn, jazýshy. «Shyńjań» gazetinde tilshi, redaktor, aýdarmashy bolǵan. 2020 jyldan bastap «Shuǵyla» jýrnalynda jumys istegen.
Ádil Semeıhanuly, «Shyńjań» gazetinde tilshi, redaktor, bólim meńgerýshisi bolyp 40 jylǵa jýyq qyzmet etti.
Bereke Juman, «Shyńjań» gazetinde aýdarmashy, bólim basshysy bolǵan.
Esbol Shaımardanuly, Shyńjań qoǵamdyq ǵylymdar akademııasynyń ǵylymı qyzmetkeri. Ǵylym doktory.
Dýman Jaqypuly, Shyńjań qoǵamdyq ǵylymdar akademııasynyń ǵylymı qyzmetkeri. Ǵylym doktory.
Qýandyq Kóbenuly, «Shyńjań» telearnasynyń júrgizýshisi. Qazaq dalasyndaǵy balbal tastardy zerttep júrgen jas ǵalym.
Qaırat Domalın, «Shyńjań» telearnasynyń beldi júrgizýshisi bolǵan. Keıin jeke kásippen aınalysqan.
Qanat Abzaluly, «Shyńjań» gazetiniń kórkemdeýshi redaktory.
Murathan Muqanuly, Shyńjań, Shonjy aýdandarynda prokýror orynbasary bolyp qyzmet atqarǵan.
Ǵarapa Násıollauly. Beıjińdegi Ulttar ýnıversıtetiniń túlegi, ánshi, sazger.
Qalysbek Babanuly, ánshi, kompozıtor.
Nurbaq Bıǵazın, mádenıet salasynyń qyzmetkeri.
Jeńishan Núsip., «Shyńjań» halyq radıosynyń qyzmetkeri.
Eske salaıyq, 2017-2020 jyldary Qytaıdyń Shyńjań óńirinde azshylyq ulttardy qýdalaý, túrmege jabý saıasatynyń qatań júrgizilgenin halyqaralyq quqyq qorǵaý oryndary men álem aqparat quraldary aıtqan edi. Alaıda Qytaı bıligi mundaı aıyptaýlardy joqqa shyǵaryp, saıası lagerlerdi «kásipkerlikke úıretý ortalyǵy» dep ataǵan edi.
2020 jyldan soń Qytaıdaǵy saıası jaǵdaı sál de bolsa jaqsarǵandaı kórindi. Qytaı kórshilerimen shekarasyn ashyp, barys-kelisin qaıtadan qalypqa keltire bastady. Bul turǵyda Qazaqstan men Qytaıdyń sońǵy birneshe jyldaǵy saıası-ekonomıkalyq baılanysynyń jaqsara túskenin atap aıtqan jón. Tipti eki el arasynda 30 kúnge deıin vızasyz rejım ornady. Alaıda munyń bári Shyńjańdaǵy saıası jaǵdaıdy tolyq jaqsarta qoımady. Syrt kózge saıası qysym azaıǵandaı sezilgenimen alasapyran áli de basylmapty.
Buǵan deıin taıaýda ǵana Qytaıǵa saparlap qaıtqan Jaqsylyq Qazymuratulynyń Shyńjańdaǵy saıası jaǵdaı týraly jazǵan maqalasyn usynǵan edik.
