الەۋمەتتىك جەلىدە «شىڭجاڭ تۇرمەسىندە قاماۋدا وتىرعان قازاق زيالىلارى» دەگەن ءتىزىم جاريالاندى. ۇستالىپ كەتكەندەردىڭ تىزىمىندە قىتايدىڭ شىڭجاڭ وڭىرىندە ءارتۇرلى سالادا قىزمەت ەتكەن ۇلتى قازاق ازاماتتاردىڭ اتى-ءجونى جانە بۇرىنعى قىزمەتى كورسەتىلگەن، دەپ حابارلايدى «ادىرنا» ءتىلشىسى «جاس الاش» گازەتىنە سىلتەمە جاساپ.
قاماۋدا وتىرعاندار:
قانات ەرەجەپ، «شىڭجاڭ» تەلەۆيزياسى باسشىسىنىڭ بۇرىنعى ورىنباسارى، قازىر زەينەتكەر.
اسان ابەۋ، «شىڭجاڭ حالىق باسپاسى» باس رەداكتورىنىڭ بۇرىنعى ورىنباسارى، زەينەتكەر.
ءالىمتاي ءبيادىل، ۇرىمجىدەگى №36 ورتا مەكتەپتىڭ ماتەماتيكا مۇعالىمى.
قاسىم وقانۇلى، شىڭجاڭ ۇيعىر اۆتونوميالىق ولكەسىنىڭ سىرتقى ىستەر باسقارماسى باسشىسىنىڭ ورىنباسارى بولعان.
جەڭىس شايح، جۋرناليست، «شىڭجاڭ» گازەتىندە ءبىراز جىل قىزمەت ىستەگەن. كەيىن شىنجاڭ ولكەلىك پك-نىڭ ۇگىت-ناسيحات بولىمىندە ىستەگەن.
نۇرجاقان ونەرحان، ءۇرىمجى قالاسىنداعى جالعىز قازاق ءتىلدى ورتا مەكتەپ – 36 ورتا مەكتەبىنىڭ وقىتۋشىسى;
ءراسىميات قابىلقاقۇلى، «شىڭجاڭ» تەلەارناسىنىڭ قاراماعىنداعى بالالار تەلەارناسىندا ستسەناريست بولىپ جۇمىس ىستەگەن.
وڭالعان مۇلىكۇلى، «شىڭجاڭ» گازەتىنىڭ بەلدى اۋدارماشىسى.
جانىبەك ءجاۋداتۇلى، «شىڭجاڭ» گازەتىندە ءتىلشى، اۋدارماشى بولىپ جۇمىس ىستەگەن.
مۇرات ىبىرايۇلى، اقىن، جازۋشى. «شىڭجاڭ» گازەتىندە ءتىلشى، رەداكتور، اۋدارماشى بولعان. 2020 جىلدان باستاپ «شۇعىلا» جۋرنالىندا جۇمىس ىستەگەن.
ءادىل سەمەيحانۇلى، «شىڭجاڭ» گازەتىندە ءتىلشى، رەداكتور، ءبولىم مەڭگەرۋشىسى بولىپ 40 جىلعا جۋىق قىزمەت ەتتى.
بەرەكە جۇمان، «شىڭجاڭ» گازەتىندە اۋدارماشى، ءبولىم باسشىسى بولعان.
ەسبول شايماردانۇلى، شىڭجاڭ قوعامدىق عىلىمدار اكادەمياسىنىڭ عىلىمي قىزمەتكەرى. عىلىم دوكتورى.
دۋمان جاقىپۇلى، شىڭجاڭ قوعامدىق عىلىمدار اكادەمياسىنىڭ عىلىمي قىزمەتكەرى. عىلىم دوكتورى.
قۋاندىق كوبەنۇلى، «شىڭجاڭ» تەلەارناسىنىڭ جۇرگىزۋشىسى. قازاق دالاسىنداعى بالبال تاستاردى زەرتتەپ جۇرگەن جاس عالىم.
قايرات دومالين، «شىڭجاڭ» تەلەارناسىنىڭ بەلدى جۇرگىزۋشىسى بولعان. كەيىن جەكە كاسىپپەن اينالىسقان.
قانات ابزالۇلى، «شىڭجاڭ» گازەتىنىڭ كوركەمدەۋشى رەداكتورى.
مۇراتحان مۇقانۇلى، شىڭجاڭ، شونجى اۋداندارىندا پروكۋرور ورىنباسارى بولىپ قىزمەت اتقارعان.
عاراپا ءناسيوللاۇلى. بەيجىڭدەگى ۇلتتار ۋنيۆەرسيتەتىنىڭ تۇلەگى، ءانشى، سازگەر.
قالىسبەك بابانۇلى، ءانشى، كومپوزيتور.
نۇرباق بيعازين، مادەنيەت سالاسىنىڭ قىزمەتكەرى.
جەڭىسحان ءنۇسىپ.، «شىڭجاڭ» حالىق راديوسىنىڭ قىزمەتكەرى.
ەسكە سالايىق، 2017-2020 جىلدارى قىتايدىڭ شىڭجاڭ وڭىرىندە ازشىلىق ۇلتتاردى قۋدالاۋ، تۇرمەگە جابۋ ساياساتىنىڭ قاتاڭ جۇرگىزىلگەنىن حالىقارالىق قۇقىق قورعاۋ ورىندارى مەن الەم اقپارات قۇرالدارى ايتقان ەدى. الايدا قىتاي بيلىگى مۇنداي ايىپتاۋلاردى جوققا شىعارىپ، ساياسي لاگەرلەردى «كاسىپكەرلىككە ۇيرەتۋ ورتالىعى» دەپ اتاعان ەدى.
2020 جىلدان سوڭ قىتايداعى ساياسي جاعداي ءسال دە بولسا جاقسارعانداي كورىندى. قىتاي كورشىلەرىمەن شەكاراسىن اشىپ، بارىس-كەلىسىن قايتادان قالىپقا كەلتىرە باستادى. بۇل تۇرعىدا قازاقستان مەن قىتايدىڭ سوڭعى بىرنەشە جىلداعى ساياسي-ەكونوميكالىق بايلانىسىنىڭ جاقسارا تۇسكەنىن اتاپ ايتقان ءجون. ءتىپتى ەكى ەل اراسىندا 30 كۇنگە دەيىن ۆيزاسىز رەجيم ورنادى. الايدا مۇنىڭ ءبارى شىڭجاڭداعى ساياسي جاعدايدى تولىق جاقسارتا قويمادى. سىرت كوزگە ساياسي قىسىم ازايعانداي سەزىلگەنىمەن الاساپىران ءالى دە باسىلماپتى.
بۇعان دەيىن تاياۋدا عانا قىتايعا ساپارلاپ قايتقان جاقسىلىق قازىمۇراتۇلىنىڭ شىڭجاڭداعى ساياسي جاعداي تۋرالى جازعان ماقالاسىن ۇسىنعان ەدىك.
