Óńir basshysy Marat Ahmetjanovtyń tóraǵalyǵymen ótken oblystyq ákimdiktiń otyrysynda aldaǵy jylý berý maýsymyna daıyndyq máselesi qaraldy.
«Aǵymdaǵy jyly jylý berý maýsymyna daıyndalýǵa barlyq qarjylandyrý kózderden shamamen 32 mlrd teńge bólindi», - dep habarlady energetıka jáne TÚKSh basqarmasy basshysynyń m.a. Aqjol Qylyshbaev. - Jylýmen jabdyqtaý kózderi men jelileriniń tozýy joǵary óńirlerde – Kókshetaý jáne Stepnogorsk qalalarynda, sondaı-aq Býrabaı, Shortandy, Aqkól, Atbasar aýdandarynda jóndeý jumystary erekshe nazar aýdarýdy talap etedi. Ondaǵy jelilerdiń tozýy 56%-dan 81%-ǵa deıin. Aldaǵy kúzgi-qysqy kezeńge daıyndyq boıynsha jóndeý naýqany bekitilgen kestege sáıkes júzege asyrylady.
Jylytý maýsymynyń sátti ótýi jáne páterlerde temperatýralyq rejımdi saqtaý úshin mańyzdy faktor basqarý organdarynyń kóp páterli turǵyn úılerdi qysta daıyndaýy bolyp tabylady. Josparǵa sáıkes, oblysta 2630 kóp páterli turǵyn úıdiń daıyndyǵyn qamtamasyz etý qajet. Eń úlken artta qalýshylyq Býrabaı aýdanynda qalyptasty.
Sý tasqyny kezinde elektr jelileriniń 286 tiregi zaqymdaldy, búgingi tańda 196-sy qalpyna keltirildi, jumystar jalǵasýda.
Sondaı-aq, jıynda jańa abonentterdi jylý jelilerine qosý tártibi, halyqty kómirmen jáne mazýtpen qamtamasyz etý máseleleri de talqylandy.
Marat Ahmetjanov aýdandar men qalalardyń ákimdikterine beıindi basqarmalarmen birlesip, jóndeý jumystarynyń barysyna monıtorıng júrgizýdi jáne aldaǵy jylý berý maýsymynyń úzdiksiz ótýi úshin tolyq daıyndyqty qamtamasyz etýdi tapsyrdy.
«Biz shtattan tys jaǵdaılar oryn alǵan kezde saldarynyń táýekelderin baǵalaý jáne zaqymdanýdy azaıtý úshin tez áreket etýge daıyn bolýymyz, jylýmen jabdyqtaýdyń buzylýyna jol bermeýimiz kerek. Sondaı-aq, apatty jaǵdaıda otyn men materıaldardyń, jabdyqtar men tehnıkanyń normatıvtik qoryn qamtamasyz etý qajet», - dep túıindedi Marat Ahmetjanov.
