Halqymyzdyń eshkimnen uıalmaıtyn tarıhy men mádenıeti, rýhanııaty, salt-dástúr, yrym-tyıymdaryna súıene otyryp, Aqadyr aýylynyń jalpyorta bilim beretin mektep aýmaǵynda osymen eki jyl qatarynan ishi dástúrge saı bezendirilgen kıiz úı qurylyp, etnoaýyl jasap, ulttyq kundylyqtarymyzdy nasıhattaý maqsatynda tól mádenıetimizdi jańǵyrtý baǵyty kózdeldi. Jaz aılary bastalysymen barlyq bilim berý mekemeleri janynan jazǵy tynyǵý lageri ashylady. Bul - oqýshylardyń demalys ýaqytyn tıimdi ári qyzyqty ótkizýdiń birden-bir joly. Etnolagerdiń ashylýyna jáne bir kúndik lager jumysyn kórý úshin qonaqtarymyz aýdandyq BB basshysy Kenjebolatova Dınara Sháımerdenqyzy men aýdan ákiminiń orynbasary Jýsýpov Qanat Amantaıuly kelip erekshe yqylastaryn bildirip, lagerdiń jumysyna alǵystaryn aıtty.
Etnolager jumysyn bastamas buryn, aldymen onyń syrtqy kórinisin erekshe bezendirýdi josparladyq. Etnolagrge mektep qabyrǵasyndaǵy barlyq oqýshylar qamtylyp, eki aýsymmen jumys jasady. «Shyn sheberge sharshy alańda tusaý joq» demekshi, lagerdiń alǵashqy kúnderinen – aq ónerli oqýshylarymyz júrgen jerlerin ánmen árlep, bı bılep dýmandatty. Talapty da talantty balalardyń qalyptasqan daǵdylaryn ári qaraı shyńdaý maqsatynda sabaq kestesi de soǵan saı quryldy. Balalardyń ár ýaqyty qundy ári júıeli ótý maqsatynda kúndelikti kún tártibi bekitildi. Tańerteń tańǵy jattyǵýdan bastap, túrli sabaqtarǵa, úıirmelerge qatysty. Etnolagerdegi barmaǵynan bal tamǵan sheberdiń barlyǵy – mektebimizdiń muǵalimderi men ata-analar. Oqýshylarymyzǵa turmystyq qajettilikke baılanysty mektep aýlasyna kıiz úı tigilip, alty baqan, bes asyq ulttyq oıyndary, ulttyq taǵamdarymyz et asý,qymyz, baýrsaq pisirý, maı bulǵaý, qurt jasaý sııaqty qazaqy umyt qalǵan ata dástúrlerdi jańǵyrtý maqsatyndaǵy ata-ájelerdiń quraq quraý, urshyq ıirý, shı toqý barysyndaǵy rýhanı-tárbıelik máni bar dástúrler kórsetip, jazǵy lagerdiń maqsat - mindetin aıqyndady.
Al táýelsizdik alǵan soń ómirge kelgender qazaqy turmystyń shet jaǵasyn kórdi desek, búgingi urpaq, ásirese qala men qala mańyndaǵy aýyl balalary ulttyq jaýharlardy kınolar men kórmelerden kórip júr. Ultynyń jádigerlerinen jatyrqap júrgen jetkinshekter joq, Abaı aıtqandaı, «kórsem, bilsem, úırensem» dep qulshynyp-aq tur. Baba ónerin meńgerip, ulttyq oıynyn oınap, dombyramen án salyp, qymyz iship shattanyp júrgen jetkinshekterdiń nebári jıyrma kúnde etnolager kózdi ashyp jumǵansha óte shyqty. Mundaı tanymdyq jumys kezinde oqýshylar shapshań sóıleýdi úırenedi, oqý jyldamdyǵyn damytady, qatarlastarymen birge toptyq jumys isteýge de beıimdeledi. Balany eńbekke baýlý jáne óz ultynyń dástúrimen, tarıhymen sýsyndatyp shyǵarýdy shamshyraq etip alǵa qaraı bettegen mektep ujymynyń eńbegi ushan-teńiz.
«Jastaıynan úıretseń tasqa oıǵan tańbadaı, qartaıǵanda úıretseń sýǵa quıǵan aq sútteı» degen sóz bar ǵoı. Sondyqtan bastaýysh synyp oqýshylarynan bastap qolónermizdi dáriptep jatsaq – eńbegimizdiń zaıa ketpegeni.
