Eks-mınıstr Qýandyq Bıshimbaev búgin, 3 sáýirde ótken jaryssózde marqum Saltanat Núkenovanyń otbasynan keshirim surady, dep habarlaıdy «Adyrna» tilshisi.
«Men de bir kezderi qyzymnan aıyryldym. 23 jasymda eki jasar qyzym aýrýdan shetinep ketti. Muny salystyrý múmkin emes ekeni túsinikti. Men eshkimdi qasaqana óltirgim kelgen joq. Biraq ómirimizde osyndaı jaǵdaı oryn aldy. Sol sebepti keshirim suraımyn»,—dedi aıyptalýshy.
Qýandyq Bıshimbaev ózin júreksiz, istegen isine ókinbeıdi degenderge de jaýap berdi.
«Qatty ókinemin. Kún saıyn Qudaıdan meni keshirýin suraımyn. Men osynda ózimdi qorǵaýym kerek, muny jeńýim kerek ekenin bilemin. Muny maǵan berilgen jaza retinde qarastyramyn. Shynymen, istegen isim úshin kez kelgen jazany kóterýge daıynmyn. Saltanatty qasaqana óltirgen joqpyn, biraq onyń ólimine men kinálimin»,—dedi ol.
