Шымкент қаласының шаруалары жыл басынан бері құны 73,6 млн АҚШ доллары болатын ауыл шаруашылық өнімдерін әлемнің 11 еліне экспорттаған.
Бұл өткен жылдың тиісті кезеңімен салыстырғанда ауыл шаруашылығы экспортының артқанын көрсетіп отыр, деп хабарлайды ҚазАқпарат тілшісі. Қалалық ауыл шаруашылығы және ветеринария басқармасы мамандарының мәліметінше, өткен жылы 65,5 млн АҚШ долларын құрайтын ауыл шаруашылығы өнімдері шетел нарығына шығарылған. Шымкенттен шыққан өнімдер Өзбекстан, Тәжікстан, Әзербайжан, Түрікменстан, Ауғаныстан, Қырғызстан, Украина, Моңғолия, Иран, Біріккен Араб Әмірліктері және Қытайға жөнелтілген. Атап айтқанда, 72,3 тонна – ірі қара еті, 12,7 тонна – қой еті, 10,1 тонна – бал, 19,5 тонна – өңделген балық сыртқы нарыққа шығарылған. Сондай-ақ, картоптың – 25,2 мың, пияздың – 45,3, қырыққабаттың – 20, көкөністің – 558, жеміс-жидектің – 406,5 тоннасы жоғарыда аталған елдерге сатылды. Бұған қоса, 78,2 мың тонна – бидай, 4,5 мың тонна – арпа, 390 тонна – дәнді дақылдар, 6,1 мың тонна –майлы дақылдар, 110,6 мың тонна – ұн, 19,2 мың тонна – өсімдік майы, 986,1 тонна – макарон өнімдері және 74,5 тонна нан-кондитер өнімдері экспортталған. Айта кетейік, шым шаһарда алғашқы жартыжылдықтағы ауыл шаруашылығы өнімінің жалпы көлемі 14.7 млрд теңгені құраған болатын. Бұл өткен жылдың тиісті кезеңімен салыстырғанда 3,7 пайызға жоғарылағанын көрсетеді. Ауыл шаруашығы өнімі көлемінің өсу қарқыны бойынша үшінші мегаполис республика бойынша бірінші орында тұр.
