ەلىمىزدىڭ جاستارى قانشالىقتى پاتريوت بولىپ ءوسىپ جاتىر؟ سونداي-اق ازاماتتاردىڭ وتان سۇيگىش بولىپ تاربيەلەنۋى بىرلىك پەن تۇراقتىلىق قۇندىلىقتارىنىڭ دامۋىنا قالاي اسەر ەتەدى؟ وسى جانە وزگە دە سۇراقتاردى جەكە كاسىپكەر ءارى ازاماتتارعا قازاق ءتىلىن ۇيرەتەتىن يۋليا لاگۋتكيناعا قويدىق.
سولتۇستىك قازاقستان وبلىسى ايىرتاۋ اۋدانىنا قاراستى لاۆروۆكا اۋىلىنىڭ تۋماسى يۋليا لاگۋتكينانى وتانشىل ازامات دەپ ايتۋعا بولادى. 26 جاستاعى ازامات مەملەكەتتىك ءتىلدى مەڭگەرىپ قانا قويماي، قازاق ءتىلىن وزگە ازاماتتارعا ۇيرەتىپ ءجۇر.
«جالپى پاتريوتيزم، بىرلىك پەن تۇراقتىلىق ول كەز كەلگەن مەملەكەت ءۇشىن جانە دە قازاقستان ازاماتتارى ءۇشىن وتە ماڭىزدى ءارى قاسيەتتى ماعىناعا يە قۇندىلىق بولۋى كەرەك. پاتريوتيزم مەن بىرلىك ءوز ەلىڭە دەگەن سۇيىسپەنشىلىك، ونىڭ مادەنيەتى مەن تاريحىن قۇرمەتتەۋ سەكىلدى ءار ازاماتتىڭ بويىنان تابىلۋى ءتيىس قۇندى قاسيەتتەر بولۋى كەرەك. ال بەرەكە-بىرلىك قوعامنىڭ ىنتىماقتاستىقتا جۇمىس ىستەپ، مەملەكەت يگىلىگى ءۇشىن قىزمەت ەتۋگە ۇندەۋى ءتيىس.
سونىمەن قاتار مەملەكەتتىك رامىزدەرگە ۇقىپتى قاراپ، وعان قۇرمەت كورسەتۋ دە ءدال سونداي ازاماتتارلىڭ قاسيەتتى بورىشى بولۋى كەرەك. ماسەلەن ءانۇراننان باستاپ ەلتاڭبا جانە مەملەكەتتىك تۋىمىزعا ايرىقشا قۇرمەت كورسەتىلەدى. مىسالى ءارتۇرلى حالىقارالىق جارىستاردا ءانۇران ورتا جولدان ۇزىلسە نەمەسە باسقا ءانۇران قويىلعان كەزدە ءبىزدىڭ سپورتشىلار ءانۇراندى ءوزى ايتىپ شىققان بىرنەشە وقيعا بولدى. بۇل جاستاردىڭ مەملەكەتتىك راسىزگە ەرەكشە قۇرمەت كورسەتەتىنىن بىلدىرسە كەرەك»، – دەيدى ول.
«قازاق ءتىلىن ءبىلۋىڭىز قوعامدا سىزگە قانداي وڭ ىقپالىن تيگىزدى؟ ازاماتتاردىڭ مەملەكەتتىك ءتىلدى ءبىلۋى قانشالىقتى ماڭىزدى؟» دەپ يۋليا لاگۋتكيناعا سۇراق قويدىق. جەكە كاسىپكەر بۇگىنگى تاڭدا مەملەكەتتىك ءتىلدى ءبىلۋ ءار ازامات ءۇشىن ۇلكەن ماڭىزعا يە ەكەنىن ەسكەرتتى.
«قازاق ءتىلىن ءبىلۋ ەڭ الدىمەن ەلىمىزدىڭ مادەنيەتى مەن تاريحىن جانە رۋحاني قۇندىلىقتارىن قۇرمەتتەۋدىڭ بەلگىسى بولىپ سانالادى. قازاق ءتىلىن ۇيرەنۋ قوعامدا ءوزىڭدى تولىققاندى ازامات رەتىندە سەزىنىنىپ، كاسىبي تۇردە دامۋعا كومەكتەسەدى. سونىمەن قاتار قازاق ءتىلىن ءبىلۋ ۇلتتىق بىرلىكتى نىعايتۋدىڭ بىردەن ءبىر فاكتورى بولىپ وتىر. مەمدەكەتتىك ءتىلدى مەڭگەرۋ ارقىلى ءار ءتۇرلى حالىقتار ياعني، ەتنوستار اراسىندا جاراسىمدى تۇسىنىستىك قالىپتاسىپ، قوعامداعى كەلىسىم مەن تۇراقتىلىق ساقتالادى. كوپ ءتىلدى ءبىلۋ ماڭىزدى بولعانىمەن مەملەكەتتىك ءتىلدى مەڭگەرۋ ءار ازاماتتىڭ پاتريوتتىق بورىشى، مىندەتى دەپ بىلەمىن جانە ول ەلدىڭ بولاشاعىنا وڭ ىپال ەتىپ، ۇلتتىق بىرەگەيلىكتى ساقتاپ، وسكەلەڭ جاستارعا مەملەكەتتىك ءتىلدى اماناتتاپ قالدىرۋعا تىكەلەي اسەر ەتەدى.
ەگەر ءبىز بۇگىن ءار قايسىسمىز قازاق تىلىندە سويلەسەك، قازاق ءتىلىن ءبىر بىرىمىزگە ناسيحاتتاپ، مەملەكەتتىك ءتىلدىڭ دەڭگەيىن كوتەرسەك وندا قازاق ءتىلىنىڭ بولاشاعى زور بولادى دەپ ەسەپتەيمىن. بۇگىنگى كىپ-كەشكەنتاي بىلدىرشىندەر كەيىن وسكەننەن كەيىن قازاقشا سۋداي سويلەيتىن بولادى. كەز كەلگەن مەملەكەتتىڭ ءتىلى ءتىرى بولسا، وندا ونىڭ حالقى دا ءتىرى بولىپ، ءوسىپ وركەندەيتىن بولادى. قازاق ءتىلىن ءبىلۋ قارىم-قاتىناس قۇرالى عانا ەمەس، سونىمەن قاتار ول ەلگە دەگەن سۇيىسپەنشىلىك پەن قۇرمەتتىڭ ايقىن كورىنىسى دەر ەدىم. سول سەبەپتى قازاق ءتىلىن بىلسەك، بۇل ەلىمىز بەن حالقىمىز ءۇشىن كوپ پايداسىن تيگىزەدى.
بۇدان بولەك حالىقارالىق ارەنادا قازاق تىلىندە سويلەيتىن قازاق حالقى دەپ ءبىزدى باسقا مەملەكەتتەر تانىپ، قۇرمەتتەيتىن بولادى. ەشكىم كسرو-نىڭ ورىس تىلىندە سويلەيتىن ازاماتى دەپ ايتپايدى. ياعني ءبارىمىزدى قازاقستاندا قازاق تىلىندە سويلەيتىن ازاماتتار تۇرادى دەپ بىلەدى.
ۇزىن ءسوزدىڭ قىسقاسى بۇگىنگى تاڭدا قازاق ءتىلىن ءبىلۋ وتە ماڭىزدى. مىسالى مەن قازاق تىلىنەن قازاق پەن ورىستارعا، ءتىپتى ۋكراينادان كەلگەن ازاماتتارعا ساباق بەرەمىن. مەنى ۋكراينا سەكىلدى شەتەلدەن كەلگەن ازاماتتاردىڭ قازاق ءتىلىن ۇيرەنسەم دەگەن قۇلشىنىسى قۋانتادى. سوڭعى كەزدەرى اعىلشىن تىلىنە ەمەس، كەرىسىنشە قازاق تىلىنە سۇرانىس كوبەيىپ جاتىر. بۇل نەگىزى جاقسى تەندەنتسيا دەپ ويلايمىن»، – دەيدى ول.
