Шымкент қаласында мемлекетке 640 млн теңге залал келтірген компания басшысы 3 жылға сотталды. Бұл туралы бүгін, 17 наурызда Шымкент қалалық прокуратурасының баспасөз қызметі айтты, деп хабарлайды «Адырна» тілшісі.
«A» ЖШС құрылыс компаниясы іс жүзінде жұмыстар орындамай, тауарларды тиеп-жөнелтпей жалған шот-фактура жазған. Сонымен қатар компания жұмысшыларына зейнетақы, әлеуметтік және жеке табыс салығын төлемеген.
«Нәтижесінде мемлекетке 640 миллион теңгеге залал келтірілді. Қала прокуратурасы осы факті бойынша Қазақстан Республикасы Қылмыстық кодексінің 216-бабының 3-бөлігіне (аса ірі мөлшерде іс жүзінде жұмыстар орындалмай, қызметтер көрсетілмей, тауарлар тиеп-жөнелтілмей шот-фактура жазу бойынша әрекеттер жасау) сәйкес сотқа дейінгі тергеп-тексеруді бастап, істі сотқа жолдады. 14 ақпандағы сот үкімімен «A» ЖШС-ның директорына 3 жыл мерзімге бас бостандығынан айыру жазасы тағайындалды»,—делінген хабарламада.
