بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى اسكەري قىزمەت جانە جەكەلەگەن ورتالىق مەملەكەتتىك ورگانداردىڭ فۋنكتسيالارىن قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «بۇۇ-نىڭ ءبولۋدى باقىلاۋ جونىندەگى كۇشتەرىنە (UNDOF) رەسۋرس ۇسىناتىن قازاقستان ۇكىمەتى مەن بۇۇ اراسىنداعى ءوزارا تۇسىنىستىك تۋرالى مەموراندۋمدى راتيفيكاتسيالاۋ تۋرالى» زاڭىن ماقۇلدادى، دەپ حابارلايدى، دەپ حابارلايدى "ادىرنا" ۇلتتىق پورتالى.
جۋرناليستەر سەنات دەپۋتاتى الىشەر ساتبالديەۆكە «قازاقستاننىڭ كورشىسى جانە ەڭ ۇلكەن وداقتاسى سوعىسىپ جاتىر. قازىرگى تاڭدا قازاقستان اسكەرىنىڭ قۋاتىن ارتتىرۋ قاجەت پە؟ سوڭعى ءۇش جىلدا قازاقستاننىڭ اسكەرىنەن قانداي پروبلەما بايقادىڭىز؟» دەگەن سۇراق قويدى.
«ارينە گەوساياسي جاعدايلاردى ەشقاشان كوز الدىمىزدان كەتىرمەي، باقىلاپ وتىرۋمىز كەرەك. قازاقستان گەوساياسي وزگەرىستەرگە بايلانىستى ءوزىنىڭ بايسالدى، سالماقتى ساياساتى بار. كوپ ۆەكتورلى ساياساتتى مەملەكەت باسشىسىنان باستاپ پارلامەنتكە دەيىن قولدانىپ وتىر. نەگىزى الەمدىك ليدەرلەردىڭ ايتىپ جاتقان پىكىرلەرىنە قاراساق، ءبىزدىڭ ۇستانىم دۇرىس ەكەنىن كورسەتىپ وتىر.
قازىرگى تاڭدا ءبىز كورشىلەرىمىزدە بولىپ جاتقان اسكەري قاقتىعىستاردى كورىپ وتىرمىز. وسىعان بايلانىستى ءوزىمىزدىڭ ەتەك-جەڭىمىزدى جيناۋىمىز كەرەك. بۇگىنگى تاڭداعى اسكەردى كۇشەيتىپ، تارتىپكە كەلتىرۋ ماسەلەسى بويىنشا جۇمىستار جۇرگىزىلىپ جاتىر. ناقتىراق ايتسام بۇگىن بىرنەشە زاڭ جوباسى ماقۇلداندى. ونىڭ ىشىندە رەزەرۆتەگى اسكەري قىزمەتتەگى ازاماتتاردى موبيليزاتسيالاۋ سەكىلدى جۇمىستار رەتتەلىپ جاتىر. بۇل نەنى كورسەتەدى، بۇگىنگى وقيعالاردىڭ تامىرىن ۇستاپ، ءبارىن باقىلاپ وتىرۋ كەرەك ەكەنىن كورسەتەدى.
سوڭعى 3 جىلداعى ماسەلە تۋرالى ايتساق، اسكەردە الىمجەتتىك پەن ءولىم ماسەلەسى ورىن الدى. بىراق سوڭعى كەزدەرى ونىڭ رەتتەلگەنىن كورىپ وتىرمىز. سەناتتاعى حالىقارالىق قاتىناستار، قورعانىس جانە قاۋىپسىزدىك كوميتەتى ەلىمىزدەگى اسكەري بولىمدەردە بولىپ، اسكەريلەردىڭ ءومىرى مەن قاۋىپسىزدىگىن كۇندەلىكتى قاداعالاپ، باقىلاپ وتىرمىز. الداعى ۋاقىتتا ونىڭ بارلىعى رەتتەلە بەرەدى دەگەن سەنىمدەمىن»، – دەيدى ول.
سونداي-اق جۋرناليست «قازاقستان اسكەرىنىڭ قۋاتىنا كوڭىلىڭىز تولا ما؟ جوق الدە الدە دە بولسا كوڭىل بولەتىن ماسەلە بار ما؟» دەپ سۇراق قويدى.
«بۇل جەردە حالىقتىڭ، كوپشىلىكتىڭ كوڭىلى تولمايدى دەگەن پىكىردى ەستىپ جاتامىز. بىراق مۇنداي كەزدە ءبىز اسكەريلەردىڭ اراسىنداعى حالىقارالىق بايقاۋلارعا ءمان بەرۋىمىز كەرەك. اتالعان بايقاۋلاردا ءبىزدىڭ اسكەريلەرىمىز بيىك تۇراتىنىن كورۋگە بولادى. سونداي-اق كەيبىر كورشى ەلدەردە بارىپ، سول جەردەگى اسكەريلەرمەن سويلەسكەن كەزدە ولار ءبىزدىڭ اسكەردىڭ دەڭگەيى جوعارى جانە وزىق قارۋلاردى مەڭگەرگەنىن ەكەنىن مويىندايدى»، – دەيدى سەنات دەپۋتاتى.
