Бүгін, 17 ақпанда президент Қасым-Жомарт Тоқаев кадрлық ауыс-түйіс жасады, деп хабарлайды «Адырна» тілшісі.
Мемлекет басшысының өкімімен Нұрдәулет Төлеев Президент әкімшілігінің Жалпы бөлімінің меңгерушісі лауазымынан босатылды. Оның орнына Ербол Адаев келді. Жаңа қызметке тағайындалғанға дейін ол Президенттің мүлкін басқару департаментінде ұйымдастыру-бақылау және кадр жұмысы бөлімінің меңгерушісі болып жұмыс істеген.
Сондай-ақ Алексей Калайчиди Президент әкімшілігінің Құқық қорғау жүйесі бөлімінің меңгерушісі лауазымынан босатылды. Бұл қызметке Шымкент қалалық Жемқорлыққа қарсы іс-қимыл агенттігін басқарған Дәурен Ерғарин тағайындалды.
Айта кетейік, бұған дейін Ерұлан Жамаубаевтың Ұлттық Банк Төрағасының бірінші орынбасары болып тағайындалғанын жазған едік.
