Бүгін Беларусьте президент сайлауы өтіп жатыр, деп хабарлайды "Адырна" ұлттық порталы.
Елдің орталық сайлау комиссиясының мәліметінше, 5325 сайлау учаскесі ашылған. Олар таңғы 08:00-ден кешкі 20:00-ге дейін жұмыс істейді.
Сайлаушылар саны 6 900 504 адамды құрайды. Оның 88 мыңнан астамы алғаш рет дауыс беруші азаматтар. Сондай-ақ, Беларусь азаматтарының 41,81 пайызы 21 мен 25 қаңтар аралығында алдын ала дауыс берген.
Бюллетеньде Александр Лукашенконың атымен қатар тағы 4 кандидат бар. Олардың тек біреуі ғана өзін «оппозициялық» деп атайды.
Александр Лукашенко жетінші рет қайта сайланады деп күтілуде.
70 жастағы Лукашенко 1994 жылдан бері Беларусьті басқарып келеді. 2020 жылғы соңғы сайлауда ол 80% дауыспен жеңіске жетті. Бұл нәтижелердің бұрмаланғаны туралы айыптаулар, бірнеше айға созылған наразылықтар мен қатал репрессияларға алып келді. Олардың нәтижесінде 65 000 адам тұтқындалды. Тұтқыннан қашып құтылғандар шетелге қашуға мәжбүр болды.
Сайлауға түсіп жатқан кандидаттар арасында тек бұрынғы депутат Анна Конопацкая ғана оппозициялық деп есептеледі.
Ол 2020 жылғы сайлауда да кандидат болып қатысып, 1,5% дауыс жинаған еді.
Қазіргі сайлауды Еуропалық дипломатия басшысы Кая Каллас «жалған» деп атады.
«Лукашенко билікті 30 жылдан бері ұстап тұр. Ертең ол қайтадан өз-өзіне тағайындалатын жалған сайлау өткізеді. Бұл - демократияны көрінеу қорлау. Лукашенконың ешқандай заңды негізі жоқ», — деп жазды Каллас X желісінде.
Жергілікті уақытпен сағат 12:00-де Беларусьтегі президенттік сайлау өткен болып есептелді.
Республика заңнамасына сәйкес, егер сайлаушылар тізімінде бар азаматтардың жартысынан астамы дауыс беруге қатысса, сайлау өткізілген деп есептеледі.
