بۇگىن، 21 قاڭتاردا «قازاقمىس»كومپانيالار توبىنىڭ جەزقازعانداعى «اننەنسك» شاحتاسىندا 39 جاستاعى جۇمىسشى قازا تاپتى. قايعىلى وقيعا تۋرالى كومپانيانىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
«وندىرىستەگى جازاتايىم وقيعا سالدارىنان 1985 جىلى تۋعان 5-رازريادتى ۇنتاقتاۋشى قازا تاپتى»، – دەلىنگەن كومپانيا حابارلاماسىندا.
كاسىپورىن مالىمەتىنشە، ءىستى تەرگەۋ ءۇشىن ارنايى كوميسسيا قۇرىلعان. كومپانيا مارقۇمنىڭ ۇجىمدىق شارتتا كورسەتىلگەن بارلىق كومەكتى كورسەتىپ، جەرلەۋ شىعىندارىن وتەيدى.
ايتا كەتەيىك، «قازاقمىس» – قۇرامىندا ون كەنىش، بەس تاۋ-كەن بايىتۋ فابريكاسى، مىس زاۋىتتارى بار قازاقستانداعى كەن وندىرەتىن ءىرى كورپوراتسيا. كورپوراتسيانىڭ قاراعاندى، بالقاش جانە جەزقازعاندا ءوندىرىس الاڭدارى بار. نەگىزگى اكتسيونەرلەرى قازاقستانداعى باي كاسىپكەرلەر – ەدۋارد وگايعا مەن ۆلاديمير كيم. «Kazakhmys Copper» اق ارقىلى كيم «قازاقمىستىڭ» 69,37%-نا، ال وگاي 29,73% ۇلەسىنە يەلىك ەتەدى.
