قاراعاندىدا تۇرعىن ۇيدەن ءورت شىعىپ، ەكى بالا كوز جۇمدى، دەپ حابارلايدى "ادىرنا" ۇلتتىق پورتالى.
قايعىلى وقيعا 9 قاڭتارعا قاراعان ءتۇنى پريشاحتينسكايا كوشەسىندەگى تۇرعىن ۇيدە بولعان. كومىرتەگى توتىعىنان ۋلانۋ جانە كۇيىك سالدارىنان ەكى بالا قازا تاپقان. ولار 2 جانە 4 جاستا بولعان.
قاراعاندى وبلىسى تجد ءباسپاسوز قىزمەتى مالىمەتىنشە، 7 جانە 9 جاستاعى ەكى بالا ورتەنگەن ۇيدەن ءوز بەتىنشە شىعىپ ۇلگەرگەن.
"جەكە تۇرعىن ءۇيدىڭ ءبىر بولىگىندە شاتىر، توبە جانە ۇيدەگى زاتتار ورتەنگەن. قۇتقارۋشىلار كەلگەنگە دەيىن 2017 جانە 2015 جىلى تۋعان ەكى بالا وزدىگىنەن شىعىپ ۇلگەرگەن، الدىن الا مالىمەت بويىنشا ولار كومىرتەگى توتىعىنان ۋلانۋ دياگنوزىمەن بالالار اۋرۋحاناسىنا جەتكىزىلدى. وقيعا ورنىنا دەرەۋ كەلگەن ورتسوندىرۋشىلەر 1964 جىلى تۋعان ايەلدى قۇتقاردى. ول ۋلانۋ، كۇيىك دياگنوزدارىمەن ماقاجانوۆ اتىنداعى كلينيكاعا جاتقىزىلدى. سونداي-اق، قۇتقارۋشىلار 2020 جانە 2022 جىلى تۋعان ەكى بالانىڭ دەنەسىن تاپتى", - دەدى قاراعاندى وبلىسى تجد ءباسپاسوز قىزمەتى وكىلى.
رەسمي مالىمەتتەرگە سايكەس، ءورتتىڭ جالپى اۋدانى 50 شارشى مەتر بولعان. تجم كۇشتەرىمەن ءورت تولىعىمەن اۋىزدىقتالدى.
ء"ورتتىڭ الدىن الا سەبەبى - ەلەكتر سىمدارىنىڭ قىسقا تۇيىقتالۋى. ءورت دەرەگى بويىنشا قىلمىستىق ءىس قوزعالدى جانە ساراپتاما تاعايىندالدى", - دەدى ۆەدومستۆو وكىلى.
