Желіде ерекше қажеттілігі бар жігітті полицияның ұстап, қамауға алғаны туралы видео тарап кетті, деп хабарлайды “Адырна” ұлттық порталы.
Оқырмандар бейненің пікір бөліміне Бас прокуратураны белгілеп, түсініктеме сұраған. Астана полиция департаменті оқиғаның мән-жайын түсіндіріп берді.
Желідегі бейнеде әйел адам ашуға булығып, денсауығы әлсіз баласын әкетіп жатқан полицейлерге дауыс көтерген.
”Неге алып бара жатырсыздар? Мұндай адамнан қандай қауіп бар? Мүгедектер арбасындағы бала не қауіп төндіруі мүмкін? Біз қарсыласпадық қой. Бүгін 8 тамыз”, – дейді әйел.
Кейіннен Астана ПД мүгедек арбадағы жігіттің ұсталмағанын хабарлады.
"Қылмыстық істің нәтижесінде Маңғыстау облысының тұрғыны "Есіл" аудандық полиция бөлімшесіне жеткізілді, сол уақытта әйел өзімен бірге қасында жүрген екі баласын бірге алып жүруді сұрады. Балаларының бірінің ерекше қажеттілігі бар", – делінген ПД түсіндірмесінде.
Түсіндірме жұмыстарынан соң әйел үйіне жіберілген.
