Фото: PLOS ONE
Жапонияның орталық бөлігіндегі ғалымдар сиырларды зебраға ұқсатып ақ жолақтармен бояудың тиімділігін зерттеді. Тәжірибе барысында қара түсті сиырлардың денесіне ақ жолақтар салынып, олар жайылымға шығарылды. Зерттеудің мақсаты – жолақтардың шаққыш шыбындарды азайтуға әсерін анықтау болды.
Space Daily басылымының жазуынша, тәжірибе нәтижесінде жолақты сиырларға боялмаған дәл сол сиырларға қарағанда екі есе аз шыбын қонған.
Ғалымдардың айтуынша, бұл зерттеу бұрын негізінен шыбындарды бақылау, модельдер және жолақты маталарға жүргізілген тәжірибелерге сүйенген теорияны нақты деректермен растады: жолақтар жәндіктерді көзбен қабылдау арқылы үркітетін әсерге ие.
Шыбындардың саны фотосуреттер арқылы есептелді. Ақ-қара жолақты сиырлардың аяқтары мен денесіне қонған шаққыш шыбындардың жалпы саны боялмаған және қара жолақпен ғана боялған сиырларға қарағанда шамамен екі есе аз болды. Жақын жерге қойылған тұзақтарға негізінен үй шыбындары, сондай-ақ аз мөлшерде мүйізді шыбындар және сирек сона жәндіктері түскен.
Сонымен қатар, жолақты сиырлар жәндіктерді үркіту үшін жасайтын қимылдарға – денесін селкілдету, аяғымен тарсылдату және құйрығын сермеуге – шамамен 20%-ға аз уақыт жұмсаған.
Зерттеудегі бір маңызды жайт: тек қара жолақтармен (қара түсті сиырдың үстінде көзге әрең көрінетін) боялған сиырларға боялмаған бақылау тобындағы сиырлармен бірдей мөлшерде шыбын қонған.
Егер бояудың иісі әсер еткен болса, онда бұл сиырларда да шыбын азаюы тиіс еді. Алайда ондай нәтиже байқалмады. Бұл әсердің бояудың химиялық құрамынан емес, жолақтардың көзге көрінетін бейнесінен туындайтынын көрсетеді.
Шаққыш шыбындар мал шаруашылығы үшін айтарлықтай мәселе болып саналады. Олар жайылым уақытын қысқартып, малға күйзеліс тудырады және салмақ қосуын төмендетеді.
