Фото: Will Oliver — Pool via CNP/Keystone Press Agency/Global Look Press
АҚШ-тың бірінші ханымы Мелания Трамп педофилияға қатысы бар деп әшкереленген қаржыгер Джеффри Эпштейнмен ешқандай қарым-қатынаста болмағанын және оның құрбандарының бірі еместігін мәлімдеді.
«Анық болу үшін айтайын: менің Эпштейнмен де, оның сыбайласы Гислейн Максвеллмен де ешқандай қарым-қатынасым болған емес», – деді ол.
Оның айтуынша, қаржыгердің көмекшісіне жіберген электронды хаты тек ресми жауап қана болған.
«Мен Эпштейннің құрбаны емеспін», – деп ерекше атап өтті АҚШ-тың бірінші ханымы.
Оның сөзінше, ол Эпштейннің қылмыстары туралы білмеген. Сондай-ақ, әлеуметтік желілерде бірнеше жылдан бері өзі мен қаржыгерге қатысты жалған суреттер тарап жүргенін айтты. Бұдан бөлек, Эпштейн оны болашақ күйеуімен таныстырды деген мәлімдемелерді жоққа шығарды. Ол Дональд Трамппен Эпштейнмен танысқанға дейін бір жыл бұрын, яғни 2000 жылы кездескенін айтты.
«Дональд екеуміз кейде Эпштейн қатысқан кештерге шақырту алатынбыз, өйткені Нью-Йорк пен Палм-Бичте адамдардың аралас ортасының қиылысуы – қалыпты жағдай», – деді бірінші ханым.
Сонымен қатар, ол Эпштейнге қатысты қылмыстық іс бойынша куәгер ретінде жауап бермегенін айтты. Оның есімі жәбірленушілердің көрсетулерінде, жауап алу хаттамаларында немесе сот материалдарында ешқашан аталмағанын атап өтті.
«Маған қарсы жала жабатын, арам ниетті және саяси мақсат көздеген тұлғалар мен ұйымдардың әрекеттері тоқтатылуы тиіс. Олар менің абыройыма нұқсан келтіріп, қаржылық пайда табуды немесе саяси ұпай жинауды көздейді», – деп мәлімдеді ол.
Сондай-ақ, Мелания Трамп өз адвокаттарымен бірге беделін қорғау үшін сот арқылы күресті жалғастыратынын айтты.
