Армения көрші елдерге территориялық талаптар қоймауы керек. Бұл туралы елдің ұлттық жиналысының спикері Ален Симонян айтты, деп хабарлайды «Адырна» тілшісі Report-қа сілтеме жасап.
«Армения көршілеріне ешқашан территориялық талаптар қоймауы тиіс. Біз аймақта ешбір ел бір-біріне шабуыл жасау туралы ойламайтындай қатынастар орнатуымыз керек. Өңірімізде бейбітшілікті қамтамасыз ету және соғыстың алдын алу үшін бәрін жасауымыз тиіс», — деді ол журналистерге.
Симонян Арменияның жаңа Конституциясын қабылдау тек ел мүддесіне байланысты екенін атап өтті.
«Армения Конституциясы мен жоспарланған түзетулер тек мемлекет мүддесіне сай енгізіледі. Оларды Әзербайжан мүддесі үшін енгізбейміз. Бұл түзетулер Арменияның сақталуы мен болашағы үшін жасалады. Конституция елімізді өңірде ешкімге қауіп деп санатуға жол бермеуі керек»,- деді ол.
Арменияның әділет министрі Србуи Галян жаңа Конституция жобасының мәтіні дайын екенін, оны «Азаматтық келісім» партиясы мен парламенттік фракциясында талқылауды жоспарлап отырғанын хабарлады. Талдау барысында Декларацияға сілтеме туралы соңғы шешім әлі қабылданбағаны айтылды.
