Әлеуметтік желілерде және бірқатар ақпарат көздерінде Қазақстанның тұңғыш президенті Нұрсұлтан Назарбаевтың қызы Дариға Назарбаеваның Астана – Алматы бағыты бойынша тұрақты жолаушылар рейсінде ұшқаны туралы ақпарат тарады, деп хабарлайды "Адырна" ұлттық порталы.
Бұл туралы блогер Әлішер Елікбаев жазған. Оның айтуынша, ол Назарбаеваны аталған бағыттағы рейстің бизнес-класында көрген. Блогердің сөзінше, ол ұшу кезінде ұйықтап қалып, қону алдында оянғанда жанындағы орында Дариға Назарбаева отырғанын байқаған.
Сондай-ақ блогердің мәліметінше, оны күзетші ертіп жүрген. Ол күзетшіні өзінің бойымен шамалас, бірақ денелі адам ретінде сипаттаған.
Желі қолданушылары бұл ақпаратқа қатысты түрлі пікір қалдырған. Олардың кейбірі мұны үнемдеумен байланыстырса, енді бірі қарапайым рейсті таңдауы әдейі көзге түспеу мақсатында болуы мүмкін екенін жазған. Кей пікірлерде саясатпен байланысты болжамдар да айтылған.
Айта кетейік, Дариға Назарбаева 2020 жылы Сенат төрағасы қызметінен кеткен. Ал 2022 жылғы қаңтар оқиғаларынан кейін саяси сахнадан көрінбей кетті.
