اقش پرەزيدەنتى دونالد ترامپ گرەنلانديانى اسكەري كۇشپەن باسىپ المايدى. بۇل تۋرالى سەناتور دجەيمس لانكفورد «Meet the press» باعدارلاماسىنا بەرگەن سۇحباتىندا ايتتى، دەپ حابارلايدى «ادىرنا» ءتىلشىسى.
«امەريكا قۇراما شتاتتارىنىڭ باسقا ەلگە باسىپ كىرۋ نيەتى جوق. ءبىز ونداي ەمەسپىز»،—دەدى لانكفورد 12 قاڭتاردا.
ول اقش-قا گرەنلانديا «ەكونوميكالىق قاۋىپسىزدىك» ءۇشىن قاجەت ەكەنىن جەتكىزدى.
«شىنى كەرەك، پرەزيدەنت ويىن ايقىن جەتكىزدى. ول — امەريكالىق اسكەردى سوعىستان ساقتاعان باسشى. ترامپ سوعىس باستاۋدى، امەريكالىق اسكەردى كەڭەيتۋدى كوزدەمەيدى، بىراق ەلدىڭ ۇلتتىق قاۋىپسىزدىگىن قورعاپ قالۋدى قالايدى. ال ونىڭ ءبىر بولىگى - ءبىزدىڭ ەكونوميكالىق قاۋىپسىزدىگىمىز بەن بولاشاعىمىز»،—دەپ تولىقتىردى سەناتور.
بۇعان دەيىن دونالد ترامپ Truth Social الەۋمەتتىك جەلىسىندە گرەنلانديانى اقش قۇرامىنا قوسۋ قاجەتتىلىگى تۋرالى جازعان ەدى. سونداي-اق ول كانادانى قوسۋ جانە پاناما كانالى اۋماعىنداعى باقىلاۋدى قايتارۋ قاجەتتىگى جونىندە دە ءسوز قوزعادى.
