سولتۇستىك ارالدى ساقتاۋ جوباسىنىڭ العاشقى كەزەڭىنىڭ ناتيجەسىندە تەڭىزدەگى سۋ كولەمى ۇلعايدى. بۇل تۋرالى بۇگىن، 13 قاڭتاردا سۋ رەسۋرستارى جانە يرريگاتسيا مينيسترلىگى ايتتى، دەپ حابارلايدى «ادىرنا» ءتىلشىسى.
«ءبىرىنشى كەزەڭنىڭ قورىتىندىسى بويىنشا تەڭىزدەگى سۋ كولەمى 42 پايىزعا ءوسىپ، 27 ملرد تەكشە مەترگە جەتتى. سۋدىڭ تۇزدىلىعى ءتورت ەسەگە جۋىق تومەندەدى، ال جىل سايىنعى بالىق اۋلاۋ كولەمى 8 مىڭ تونناعا دەيىن جەتتى»،—دەلىنگەن حابارلامادا.
قازىرگى تاڭدا ارال تەڭىزىنىڭ سولتۇستىك بولىگىن قالپىنا كەلتىرۋ جوباسىنىڭ ەكىنشى كەزەڭىن ىسكە اسىرۋ ماسەلەسى قاراستىرىلىپ جاتىر. مينيسترلىكتىڭ مالىمەتىنشە، جوبا نەگىزگى 3 نەگىزگى باعىتتى قامتيدى. اتاپ ايتقاندا، سولتۇستىك ارال تەڭىزىندە سۋ جيناقتاۋدىڭ كولەمى مەن تيىمدىلىگىن ارتتىرۋ، سۋ رەسۋرستارىن باسقارۋدى جاقسارتۋ، بالىق شارۋاشىلىعى مەن ەكوتۋريزمدى دامىتۋ، ءوڭىردىڭ ەكولوگيالىق جاعدايىن جاقسارتۋ بويىنشا ماڭىزدى ءىس-شارالار قاراستىرىلعان.
