2025 جىلى جوو جانە كوللەدج ستۋدەنتتەرى ءۇشىن ستيپەنديا 2 ەسە، ماگيسترانتتار مەن دوكتورانتتار ءۇشىن 1,75 ەسە ارتادى. بۇل تۋرالى بۇگىن، 13 قاڭتاردا جوعارى ءبىلىم جانە عىلىم مينيسترلىگى ايتتى، دەپ حابارلايدى «ادىرنا» ءتىلشىسى.
«1 قىركۇيەكتەن باستاپ باكالاۆريات ستۋدەنتتەرىنە ستيپەنديا 52 372 تەڭگەگە دەيىن، ال پەداگوگيكالىق جانە مەديتسينالىق باعىتتارداعى ءبىلىم الۋشىلارعا – 84 000 تەڭگەگە دەيىن، ماگيسترانتتارعا – 117 098 تەڭگەگە، دوكتورانتتارعا – 262 500 تەڭگەگە دەيىن وسەدى. ينتەرناتۋرادا وقيتىن ستۋدەنتتەرگە ستيپەنديا – 94 862 تەڭگە، ال رەزيدەنتۋرادا – 134 664 تەڭگە كولەمىندە تولەنەتىن بولادى»،—دەلىنگەن حابارلامادا.
ەمتيحان سەسسياسىن «وتە جاقسى» تاپسىرعان جاعدايدا ستۋدەنتتەردىڭ جوعارى ستيپەنديا الۋ مۇمكىندىگى ساقتالادى.
مەملەكەتتىك ستيپەنديادان باسقا، جوعارى وقۋ ورنىنىڭ عىلىمي كەڭەسىنىڭ شەشىمى بويىنشا 104 744 تەڭگە مولشەرىندە تاعايىندالاتىن وقۋدا ەرەكشەلەنگەن ستۋدەنتتەرگە، وليمپيادالاردىڭ، شىعارماشىلىق كونكۋرستاردىڭ، سپورتتىق جارىستاردىڭ جەڭىمپازدارىنا ارنالعان پرەزيدەنتتىك ستيپەنديا بار.
پرەزيدەنتتىك ستيپەنديانى 3-وقۋ جىلىنان باستاپ ستۋدەنتتەر جانە 2-وقۋ جىلىنان باستاپ ماگيسترانتتار الا الادى. مۇنداي ستيپەندياعا بيۋدجەتتىك نەگىزدە وقيتىن ستۋدەنتتەر دە، اقىلى نەگىزدە وقيتىندار دا قۇقىلى.
