ازەربايجان پرەزيدەنتى يلحام اليەۆ تمد ەلدەرى باسشىلارىنىڭ بەيرەسمي سامميتىنە قاتىسۋ ءۇشىن سانكت-پەتەربۋرگكە اتتانعان كەزدە، اۋە اپاتى بولعانى تۋرالى حابار بەرىلىپ، مەملەكەت باسشىسى كەرى قايتتى، دەپ حابارلايدى "ادىرنا" ۇلتتىق پورتالى.
گەيدار اليەۆ اتىنداعى حالىقارالىق اۋەجايعا ۇشىپ كەلگەننەن كەيىن، يلحام اليەۆ وسى وقيعاعا بايلانىستى كەڭەس وتكىزدى.
كەڭەس بارىسىندا ازەربايجان پرەزيدەنتى اپاتتان قازا بولعاندارعا كوڭىل ايتىپ، بۇل تراگەديانىڭ ازەربايجان حالقىن ۇلكەن قاسىرەتكە دۋشار ەتكەنىن اتاپ ءوتتى.
"بۇگىن تاڭەرتەڭ مەن باكۋدان سانكت-پەتەربۋرگكە تمد سامميتىنە قاتىسۋ ءۇشىن ۇشقانىمدا، ماعان وسى اپات تۋرالى حابار بەرىلدى. مەن دەرەۋ تاپسىرما بەرىپ، ۇشاق باكۋعا قايتىپ ورالدى. ءالى ۇشاقتا بولعانىمدا، مەن ءتيىستى نۇسقاۋلار بەرىپ، پرەمەر-مينيسترمەن سويلەستىم، ونىڭ باسشىلىعىمەن كوميسسيا قۇرىلدى. سونىمەن قاتار، اپات بولعان اكتاۋ قالاسىنا ازەربايجان دەلەگاتسياسى جىبەرىلدى. ءتيىستى تاپسىرما بەرىلدى" - دەدى ول.
ونىڭ ايتۋىنشا، اپاتتىڭ ناقتى سەبەبىن ايتۋعا ءالى ەرتە.
"كوميسسيانىڭ مىندەتى – اپاتتىڭ سەبەبى مەن بارلىق مالىمەتتەرىن تولىق زەرتتەپ، مەنى جانە ازەربايجان جۇرتشىلىعىن اقپاراتتاندىرۋ. اپات ساتتەرى بۇقارالىق اقپارات قۇرالدارىندا جانە الەۋمەتتىك جەلىلەردە جاريالاندى. اركىم بۇل ساتتەردى كورە الادى. بىراق اپاتتىڭ ناقتى سەبەپتەرى بىزگە بەلگىسىز. ءار ءتۇرلى بولجامدار بار. مەنىڭ ويىمشا، ءالى وسى ماسەلە تۋرالى ايتۋ ەرتە. بۇل ماسەلە تولىق تەرگەلۋى كەرەك. باس پروكۋراتۋرا قىلمىستىق ءىس قوزعادى، جانە ازەربايجان جۇرتشىلىعى كوميسسيا جۇمىسىنىڭ ناتيجەلەرى مەن قىلمىستىق ءىستىڭ بارىسى تۋرالى ۇنەمى حاباردار بولىپ وتىرادى" - دەدى ول.
