ءماجىلىس دەپۋتاتى اسحات ايماعامبەتوۆ سەمەيدە شىرشانى بەزەندىرۋ كەزىندە جاراقات العان مۇعالىم تۋرالى پىكىر ءبىلدىردى، دەپ حابارلايدى «ادىرنا» ءتىلشىسى.
وقىس وقيعا 22 جەلتوقساندا بولعان ەدى.
«سەمەي قالاسىندا مۇعالىمدەردى جاڭاجىلدىق شىرشانى ورناتۋعا تارتىپ، سونىڭ سالدارىنان ءبىر مۇعالىمىمىزدىڭ اۋىر جاراقات العانى الاڭداتتى. مۇنداي جاعدايدى جاي عانا «جاڭساقتىق» دەپ قاراستىرۋعا بولمايدى. «پەداگوگ مارتەبەسى تۋرالى» زاڭنىڭ 6-بابىندا ناقتى كورسەتىلگەن: مۇعالىمدەردى كاسىبي مىندەتتەرىنە جاتپايتىن جۇمىستارعا تارتۋعا قاتاڭ تىيىم سالىنادى. جاڭا جىلدىق شىرشا ورناتۋ، كوشە تازالاۋ، باسقا دا ناۋقاندارعا ماجبۇرلەپ تارتۋ سياقتى ەسكى «داستۇرلەردەن» ءبىرجولا باس تارتۋىمىز كەرەك. بۇل – زاڭدى ورەسكەل بۇزۋ»،— دەدى ول.
ايتۋىنشا، وبلىس باسشىلىعى بۇل جاعدايدى مۇقيات تەرگەپ، جاۋاپتى تۇلعالاردى جازالاۋى ءتيىس.
«مۇعالىمدەرگە تىكەلەي مىندەتىنە جاتپايتىن جۇمىستارعا تارتۋدى توقتاتۋ ءۇشىن مينيسترلىك باقىلاۋدى كۇشەيتۋى قاجەت. ءبىلىم باسقارمالارى مەن مەكتەپ اكىمشىلىكتەرى مۇعالىمدەردىڭ قۇقىقتارىن قاتاڭ ساقتاۋ بويىنشا مىندەتتەرىن ورىنداۋى ءتيىس. مەملەكەت باسشىسى ءاردايىم مۇعالىمدەردىڭ مارتەبەسىن قورعاۋ مەن ولاردىڭ قۇقىقتارىن ساقتاۋ ماسەلەسىن ەرەكشە نازاردا ۇستاپ كەلەدى. ءبىزدىڭ مىندەتىمىز – سول تالاپتاردى ورىنداپ، زاڭنىڭ جۇمىس ىستەۋىن قامتاماسىز ەتۋ. جاراقات العان ارىپتەسىمىزگە تەزىرەك ساۋىعىپ كەتۋىن تىلەيمىن»،— اسحات ايماعامبەتوۆ.
ەسكە سالايىق، بۇعان دەيىن سەمەيدە شىرشا بەزەندىرۋگە بارعان مۇعالىمدەردىڭ ءبىرى اۋىر جاراقات العانىن جازعان ەدىك.
