سەمەي قالاسىندا شىرشانى بەزەندىرۋ كەزىندە مۇعالىم بيىكتەن قۇلاعاننان كەيىن قالالىق ءبىلىم ءبولىمىنىڭ باسشىسى قىزمەتىنەن قۋىلدى. بۇل تۋرالى بۇگىن، 23 جەلتوقساندا وبلىستىق ءبىلىم باسقارماسىنىڭ باسشىسى نۇرجان احمەتقاليەۆ مالىمدەدى، دەپ حابارلايدى «ادىرنا» ءتىلشىسى.
ايتۋىنشا، وبلىس اكىمىنىڭ توراعالىعىمەن جەدەل جۇمىس كەڭەسى وتكەن.
«كەڭەس بارىسىندا ءبىلىم باسقارماسىنا قىزمەتتىك تەكسەرىس جۇرگىزۋ، ال دەنساۋلىق ساقتاۋ باسقارماسىنا زارداپ شەككەن مۇعالىمدى تاۋلىك بويى باقىلاۋعا الۋ تاپسىرىلدى. قىزمەتتىك تەكسەرىس ناتيجەسىندە سەمەي قالاسىنداعى ءۇش مەكتەپتىڭ مۇعالىمى شىرشانى بەزەندىرۋ جۇمىسىنا زاڭسىز تارتىلعانى انىقتالدى. ولاردىڭ اراسىندا №49 مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى قۋات ايتقاليەۆ جاراقات العان»،–دەپ ءتۇسىندىردى ول.
قازىرگى ۋاقىتتا تارتىپتىك جاۋاپكەرشىلىككە مەكتەپ ديرەكتورلارى تارتىلدى، ال سەمەي قالاسىنىڭ ءبىلىم ءبولىمىنىڭ باسشىسى ءوز لاۋازىمىنان بوساتىلدى.
ەسكە سالايىق، 21 جەلتوقساندا قۋات ايتقاليەۆ ەسىمدى مۇعالىم بيىكتەن قۇلاعان ەدى. وقۋ-اعارتۋ ءمينيسترى عاني بەيسەمباەۆ بۇل ارەكەتتى «زاڭبۇزۋشىلىق» دەپ اتاپ، جاعداي باقىلاۋدا ەكەنىن مالىمدەدى.
