مەن مۇحتار شاحانوۆتىڭ ولەڭدەرىمەن تانىسا باستاعاندا اتامەن كەزدەسكىم كەلدى.
بىراق، كەزدەسۋدەن بۇرىن اتانىڭ ولەڭدەرىن وقىپ، ىزدەنە باستادىم. شاحانوۆتىڭ «وتىرار داستانىن» وقىعان ساتتە بويىما ەرەكشە رۋح دارىپ، ەلىمە دەگەن ماحابباتىم ارتا ءتۇستى. «ءوزى تۋعان ولكەنىڭ اۋاسىمەن تىنىستاۋدىڭ» ماڭىزىن ۇعىنىپ، بويىمدى پاتريوتتىق سەزىم بيلەپ الدى. مۇحتار شاحانوۆپەن كەزدەسپەس بۇرىن مەن اتانىڭ ءومىر جولىن وقىپ، جان-جاقتى ىزدەنە باستادىم. اتانىڭ اكەسى بوتەن، اناسى بولەك بولسا دا تاعدىر قوسقان قوس باۋىرى – تولەگەن ايبەرگەنوۆ پەن ءشامشى قالداياقوۆ تۋرالى قىزىقتى دەرەكتەردى تاپتىم. جاڭا دەرەكتەر تاۋىپ، جاڭا ولەڭدەرىمەن تانىسقان سايىن اتامەن كەزدەسەر ءساتتى تاعاتسىزدانا كۇتتىم.
15- جەلتوقساندا ءوزىم وقيتىن №93 مەكتەپ-ليتسەيدە مۇحتار شاحانوۆپەن كەزدەسۋ ءوتتى. اتانى العاش كورگەندە ءوز كوزىمە ءوزىم سەنبەي، قۋانىشتان توبەم كوككە ەكى ەلى جەتپەي قالدى. مەكتەپ وقۋشىلارى اتانىڭ سوزىنە جازىلعان اندەردى شىرقاپ، ولەڭ وقىدى. اتانىڭ كوزىندەگى قۋانىشتى بايقاپ، مەكتەبىمە دەگەن ماقتانىش سەزىمى مەنى دە اينالىپ وتپەدى.
16- جەلتوقسان – تاۋەلسىزدىك كۇنى. بۇل كۇندى وسىدان 33 جىل بۇرىن ەل تاۋەلسىزدىگى جولىندا كۇرەسىپ، قازاق جاستارىن قورعاپ قالعان مۇحتار شاحانوۆپەن بىرگە قارسى الدىق. كەزدەسۋدىڭ ەكىنشى كۇنىندە جاستارعا رۋح بەرۋ ماقساتىندا جازىلعان اتامىزدىڭ «جىگەرلەندىرۋ» اتتى ولەڭىن وقىپ بەردىم. ۇلى تۇلعانىڭ الدىندا ولەڭ وقۋ باقىتى بۇيىرعانىنا قۋانىپ، ءارى قوبالجىپ، كەرەمەت سەزىمدى باستان كەشىردىم. «كوڭىل تولقىنى» كۇيىنىڭ سۇيەمەلدەۋىمەن جەتەكشىم ەركەجان قايراتقىزى تولەگەن ايبەرگەنوۆتىڭ مۇحتار شاحانوۆقا ارناپ جازىلعان «ساعىنىش» جايلى ولەڭىن وقىدى. كەش سوڭىندا اتا كىتابىن سىيلاپ، باتاسىن بەردى. وسىلايشا وسى 2 كۇن ماعان رۋحاني سەرپىلىس سىيلادى. مەن قانشا جاسقا كەلسەم دە، بۇل كەزدەسۋدى ۇمىتپايمىن!
ءوزى ءۇمىت كۇتكەن ۇرپاعىنىڭ اتىنان مۇحتار اتاما العىس ايتا وتىرىپ، دەنىنە ساۋلىق تىلەيمىن!
الپىس ومار
№93 مەكتەپ-ليتسەيىنىڭ
6 «ا» سىنىپ وقۋشىسى
