20 جەلتوقساندا الماتى قالاسىنىڭ ناۋرىزباي اۋدانىندا بولعان اتىس وقيعاسىنىڭ ءمان-جايى بەلگىلى بولدى، دەپ حابارلايدى "ادىرنا" ۇلتتىق پورتالى almaty_press سايتىنا سىلتەمە جاساپ.
اقپاراتقا سايكەس، وقيعا Nef Uptown تۇرعىن ءۇي كەشەنىندە ورىن العان. قىلمىسكەر تۇرعىن ءۇي اۋماعىنا ەلەكتريك رەتىندە كىرىپ، پاتەرلەردىڭ بىرىنە باسىپ كىرگەن. ىشىندە بولعان وتباسىلىق جۇپقا وق اتقان. زارداپ شەككەن ەرلى-زايىپتىلاردىڭ جاسى شامامەن 40-تا. وقيعا كەزىندە بالالار ۇيدە بولماعان.
ەرلى-زايىپتىلار اۋىر جاراقات العان. ايەل ادامنىڭ كەۋدە تۇسى جاراقاتتانىپ، قولى سىنعان. ەر ادام اۋىر جاعدايدا بەس ساعاتتىق وپەراتسيادان كەيىن عانا ەسىن جيعان. قازىرگى ۋاقىتتا ەكەۋى دە اۋرۋحانادا جاتىر.
تەرگەۋ نۇسقاسى بويىنشا قىلمىستىڭ ماقساتى – ۇرلىق. قىلمىسكەر پوليتسيا كەلگەنشە وقيعا ورنىنان قاشىپ ۇلگەرگەن. بۇل رەتتە ەليتالىق تۇرعىن ءۇي كەشەنىنىڭ اۋماعىندا بەينەباقىلاۋ كامەرالارى جوق ەكەنى انىقتالدى. بۇعان دەيىن تۇرعىندار بۇل ماسەلەگە بايلانىستى بىرنەشە رەت شاعىمدانعان.
الماتى پوليتسياسى قىلمىستىق ءىس قوزعاپ، تەرگەۋ جۇمىستارىن باستادى.
"قىلمىستى اشۋعا باعىتتالعان جەدەل-ىزدەستىرۋ شارالارى جۇرگىزىلىپ جاتىر", – دەپ حابارلادى پوليتسيا دەپارتامەنتى.
بۇعان دەيىن، بەلگىسىز ەر ادامنىڭ ناۋرىزباي اۋدانىنداعى تۇرعىن ءۇي كەشەنىنە باسا-كوكتەپ كىرىپ، ەكى ادامعا وق اتقانى تۋرالى جازعان ەدىك.
