قازاقستاننىڭ بۇرىنعى پرەزيدەنتتەرىنىڭ دەنساۋلىعى مەن جەكە ءومىرى تۋرالى اقپارات مەملەكەتتىك قۇپياعا جاتادى جانە ونى تاراتۋعا تىيىم سالىنادى. بۇل تۋرالى بۇگىن سەناتتىڭ جالپى وتىرىسىندا ايتىلدى، دەپ حابارلايدى “ادىرنا” ۇلتتىق پورتالى.
سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك ءبىلىم بەرۋ جيناقتاۋ جۇيەسى، اقپارات، قوعامدىق دامۋ، مادەنيەت جانە ارحيۆ ءىسى سالالارىندا ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكى وقىلىمدا قارالىپ، ماقۇلداندى.
وسى ماقۇلدانعان زاڭ اياسىندا «مەملەكەتتىك قۇپيالار تۋرالى» قر زاڭىنا ءتيىستى تولىقتىرۋ قاراستىرىلدى. بۇل جونىندە سەناتتىڭ الەۋمەتتىك-مادەني دامۋ جانە عىلىم كوميتەتىنىڭ قورىتىندى مالىمەتىندە باياندالعان.
- «مەملەكەتتىك قۇپيالار تۋرالى» زاڭىنا بارلاۋشىلىق، قارسى بارلاۋشىلىق، جەدەل-ىزدەستىرۋشىلىك جانە وزگە دە قىزمەتتى مەملەكەتتىك قۇپيالارعا جاتقىزۋدان باسقا، قازاقستان پرەزيدەنتىنىڭ جانە ونىڭ وتباسى مۇشەلەرىنىڭ قاۋىپسىزدىگىن قامتاماسىز ەتۋدىڭ ۇيىمداستىرىلۋى، كۇشتەرى، قۇرالدارى مەن ادىستەرى تۋرالى مالىمەتتەر، قر پرەزيدەنتىنىڭ دەنساۋلىق جاعدايى مەن جەكە ءومىرى تۋرالى مالىمەتتەر، قازاقستاننىڭ ەكس-پرەزيدەنتتەرىنىڭ جانە ولاردىڭ وتباسى مۇشەلەرى تۋرالى ۇقساس مالىمەتتەردى ەنگىزۋ بويىنشا تولىقتىرۋ ەنگىزىلەدى، - دەلىنگەن سەنات كوميتەتىنىڭ اقپاراتىندا.
