قازاقستاننىڭ مادەنيەت جانە اقپارات مينيسترلىگى وبلىستاعى مادەنيەت نىساندارىنىڭ قۇرىلىسىن جەدەلدەتىپ، شىعارماشىلىق يندۋسترياعا قولداۋ كورسەتۋ ءۇشىن جاڭا قورلار مەن زاڭدار قابىلدادى. سونىمەن قاتار، اقپاراتتىق سالاداعى رەفورمالار جۋرناليستەردىڭ كاسىبي تۇرعىدان دامۋىنا باعىتتالعان. بۇل تۋرالى قازاقستان رەسپۋبليكاسىنىڭ مادەنيەت جانە اقپارات ۆيتسە-ءمينيسترى ەۆگەني كوچەتوۆ جۋرناليستەرمەن وتكەن بريفينگتە مالىمدەدى، دەپ حابارلايدى وڭىرلىك كوممۋنيكاتسيالار قىزمەتىنەن.
مينيسترلىكتىڭ نەگىزگى باعىتتارىنىڭ ءبىرى — مادەنيەت سالاسىن دامىتۋ، ونىڭ ىشىندە مادەنيەت نىساندارىنىڭ قۇرىلىسىمەن جانە قايتا جوندەۋمەن بايلانىستى ماسەلەلەر. ۆيتسە مينيستر وسى سالادا اتقارىلعان جۇمىس جايىندا باياندادى.
«2023 جىلى مادەنيەت سالاسىندا 44 جاڭا نىسان بوي كوتەرىپ، 260 نىسان كۇردەلى جوندەۋدەن وتكەن. بۇل جۇمىستاردىڭ ناتيجەسىندە 2024 جىلدىڭ سوڭىنا دەيىن 45 جاڭا مادەنيەت نىسانى سالىنىپ، 255 نىسان كۇردەلى جوندەۋدەن وتەدى دەپ جوسپارلانىپ وتىر. اقمولا وبلىسىندا مادەنيەت نىساندارىنىڭ قۇرىلىسى «اۋىل — ەل بەسىگى» باعدارلاماسى اياسىندا جۇزەگە اسىرىلۋدا. مىسالى، 9 جاڭا مادەنيەت نىسانى سالىندى، 3 نىسان رەكونسترۋكتسيادان ءوتتى، 85 نىسان جوندەۋ جۇمىستارىنا ۇشىرادى. الداعى ۋاقىتتا بۋراباي اۋدانىندا جاڭا مادەنيەت نىسانى اشىلماق، ال تسەلينوگراد اۋدانىندا دا وسىنداي جۇمىستار باستالادى»، — دەدى ەۆگەني كوچەتوۆ.
مينيسترلىك، سونداي-اق شىعارماشىلىق ادامداردى قولداۋ باعىتىندا ءتۇرلى سىيلىقتار مەن ماراپاتتار ۇيىمداستىرادى. كەلەسى اپتادا ۇلتتىق ادەبيەت سىيلىعى، «رۋحاني قازىنا» فەستيۆالى مەن «ۇماي» تەاترالدىق ونەر سىيلىعى تابىستالادى.
ۆيتسە-مينستر سونداي اق قازاقستانداعى كينو يندۋستريا جاڭالىقتارىمەن دە ءبولىستى. ونىڭ ايتۋىنشا، سەناتتا وتاندىق فيلمدەردى قارجىلاندىرۋعا ارنالعان ارنايى زاڭ جوباسى تالقىلانۋدا. بۇل وزگەرىستەر قازاقستاننىڭ مادەنيەت سالاسىن دامىتۋعا باعىتتالعان جاڭا قارجىلاندىرۋ مەحانيزمدەرىن ەنگىزۋگە مۇمكىندىك بەرەدى. اقمولا وبلىسىندا دا كينو سالاسىنا قاتىستى جاڭا تاسىلدەر ەنگىزىلىپ، مەملەكەتتىك قولداۋ كورسەتۋ باعىتىندا كونكۋرستىق راسىمدەر مەن قارجىلاندىرۋ شارتتارى قايتا قارالدى.
سونىمەن قاتار ەلدەگى اقىن جازۋشىلارعا جاسالىپ جاتقان قولداۋ جايى دا ءسوز بولدى.
«ادەبيەت بارلىق ونەردىڭ تورەسى سانالادى. سوندىقتان دا وتاندىق اقىندار مەن جازۋشىلاردى قولداۋ مەملەكەتتىك ساياساتتىڭ باستى باعىتتارىنىڭ ءبىرى بولىپ قالا بەرەدى. سوڭعى جىلدارى مەملەكەت جاڭا تۋىندىلار شىعارۋعا، اسىرەسە جاس تالانتتاردى قولداۋعا ەرەكشە نازار اۋدارۋدا. جاڭا شىعارمالاردىڭ باسىلىپ شىعۋى، سونداي-اق مادەني مۇرانى ساقتاۋ ءۇشىن بۇرىنعى شىعارمالار قايتا باسىلىپ، جاستار اراسىندا ادەبيەتكە دەگەن قىزىعۋشىلىقتى ارتتىرۋ جۇمىستارى جالعاسۋدا»، — دەپ تولىقتىردى ۆيتسە-مينيستر.
ۆيتسە-ءمينيستردىڭ ايتۋىنشا، قازاقستاندا كرەاتيۆتى يندۋستريانى دامىتۋعا ەرەكشە كوڭىل بولىنۋدە. مەملەكەت باسشىسىنىڭ تاپسىرماسىنا سايكەس، كرەاتيۆتى كاسىپكەرلەرگە قولداۋ كورسەتۋ ءۇشىن ارنايى قور قۇرىلىپ، زاڭ جوباسى ازىرلەنۋدە. كرەاتيۆتى حابتار قۇرۋ ارقىلى حالىقتىڭ شىعارماشىلىق الەۋەتىن دامىتۋ ماقساتىندا رەسپۋبليكادا 10 hup اشىلدى، ال 2024 جىلى اقمولا وبلىسىنىڭ كوكشەتاۋ قالاسىندا جاڭا كرەاتيۆتى hup اشۋ جوسپارلانۋدا. بۇل جوبالار ادامدارعا ءوز قولىمەن جاساعان دۇنيەلەرىن تابىس كوزىنە اينالدىرۋعا مۇمكىندىك بەرەدى. كرەاتيۆتى يندۋسترياعا مەملەكەت تاراپىنان قولداۋ كورسەتۋ ءۇشىن ۇلتتىق لوتورەيا وپەراتورىنىڭ قاراجاتىنىڭ ءۇش پايىزى بولىنەدى.
2023 جىلى جۋرناليستەر ءۇشىن ماڭىزدى زاڭنامالىق وزگەرىستەر بولدى. جۋرناليستيكا سالاسىنداعى كاسىبي ستاندارتتاردى نىعايتۋ ءۇشىن «ماسمەديا تۋرالى» زاڭ قابىلدانىپ، جۋرناليستەردىڭ اككرەديتاتسياسى تۋرالى جاڭا ەرەجەلەر ەنگىزىلدى. ونلاين جارناما جانە پلاتفورمالار بويىنشا دا جاڭا زاڭدار كۇشىنە ەندى.
«ەندى بلوگەرلەر جارنامالاردى مىندەتتى تۇردە بەلگىلەپ، وزدەرىنىڭ جاريالانىمدارىنا جاۋاپتى بولۋعا ءتيىس. بۇل زاڭنامالىق شارالار بلوگەرلەر مەن ونلاين جارناما نارىعىن رەتتەۋگە باعىتتالعان جانە مەملەكەتتىڭ وسى سالاداعى كىرىستەرىن ارتتىرۋعا مۇمكىندىك بەرەدى»، — دەپ تۇيىندەدى ۆيتسە-مينيستر.
بۇگىنگى كۇنى قازاقستاندا كوپتەگەن قايىرىمدىلىق ۇيىمدارى جۇمىس ىستەيدى، الايدا بۇل سالادا دا كەيبىر زاڭسىزدىقتار مەن ماسەلەلەر تۋىنداپ وتىر. ۆيتسە-ءمينستردىڭ ايتۋىنشا، مينيسترلىك بۇل ماسەلەگە نازار اۋدارىپ، قايىرىمدىلىق ۇيىمدارىنا قاتىستى زاڭ جوباسىن ازىرلەۋدى باستاعان. قازىر وسى سالادا جاڭا كونتسەپتسيا دايىن، الداعى ۋاقىتتا ءتيىستى زاڭنامالىق شارالار قابىلدانادى.
مادەنيەت جانە اقپارات مينيسترلىگى الداعى ۋاقىتتا دا مادەنيەتتى دامىتۋ، شىعارماشىلىق سالالاردى قولداۋ جانە اقپاراتتىق قاۋىپسىزدىكتى قامتاماسىز ەتۋ باعىتىندا كوپتەگەن ماڭىزدى شارالاردى جۇزەگە اسىرۋدى جوسپارلاپ وتىر.
