1 قاراشا كۇنى ۇكىلى ىبىراي اتىنداعى اقمولا وبلىستىق فيلارمونياسىندا «قۇرمەت» وردەنى مەن «ەرەن ەڭبەگى ءۇشىن» مەدالىنىڭ يەگەرى تۇرلىحوجا بازاروۆتىڭ 75 جىلدىعىنا ارنالعان «كۇمبىرلەتكەن كەۋدەمدى كۇي ەركەسى» اتتى شىعارماشىلىق كەشى ءوتتى.
تۇرلىحوجا بازاروۆ ك.كۇمىسبەكوۆ اتىنداعى قازاق حالىق اسپاپتار وركەسترىنىڭ ىرگەتاسىن قالاۋشىلاردىڭ ءبىرى جانە شىعارماشىلىق جولىن وسى وركەسترمەن تۇبەگەيلى بايلانىستىرىپ، وركەستردىڭ ءوسىپ، وركەندەۋى جولىندا باس ديرەجەر رەتىندە بەل شەشپەي جۇمىس ىستەدى.
بۇگىن بار ءومىرىن ونەر جولىنا ارناعان ءبىرتۋار تۇلعانىڭ شىعارماشىلىق كەشىندە شاكىرتتەرى مەن ءبىر ساحنادا جۇرگەن ارىپتەستەرى: “قازاقستاننىڭ ەڭبەك سىڭىرگەن ارتىستەرى” شولپان دۇكىمباەۆا، بيسارا ماكەنوۆا، “مادەنيەت قايراتكەرلەرى” جانات ەسوۆ، تولعانباي سەمباەۆ، گۇلجان احمەتوۆا، “مادەنيەت سالاسىنىڭ ۇزدىگى” ۆالەريا بوليەۆا، حالىقارالىق جانە رەسپۋبليكالىق بايقاۋلاردىڭ لاۋرەاتتارى “گاككۋ” حالىقتىق بي ءانسامبلى، جەتەكشىسى “مادەنيەت سالاسىنىڭ ۇزدىگى” گۋلميرا ورداباەۆا، اياگوز قالماعانبەتوۆا، سەرىكبولسىن بەكمولدين، ابزال ەس، رينات نۇرمۇحان، قونىس جۇكەنوۆ، اسەل توقسانوۆا جانە ك.كۇمىسبەكوۆ اتىنداعى قازاق حالىق اسپاپتار وركەسترى، ديريجەرلارى رۋسلان قويشىباەۆ پەن جانات راشيت.
سونداي-اق، تۇرلىحوجا بازاروۆتىڭ ۇلى ەربول بازاروۆ كسيلوفوندا ويناپ، تۋىسقان قارىنداسى گۇلدەن المەنوۆا ءبىر ساحنا تورىندە تۇرىپ، مەرەيتوي يەسىمەن بىرگە ونەر كورسەتتى.
كورەرمەندەر تامىلجىعان ءان مەن كۇمبىرلەگەن كۇيدەن تۇرعان تاماشا كەشتىڭ كۋاسى بولدى.
