استانادا حالىقارالىق مۇگەدەكتىگى بار ادامدار كۇنى قارساڭىندا «AMANAT» پارتياسىنىڭ قولداۋىمەن قازاقستان مۇگەدەكتەر كونفەدەراتسياسى ۇيىمداستىرعان ءXVIى «جان شۋاق» قوعامدىق سىيلىعىنىڭ لاۋرەاتتارىن ماراپاتتاۋ ءراسىمى ءوتتى. بۇل سىيلىق جىل سايىن قوعامدىق قىزمەتتە ەرەكشە ناتيجەلەرگە قول جەتكىزگەن مۇگەدەكتىگى بار ادامدارعا بەرىلەدى.
ماراپاتتاۋ ءراسىمىن اشا وتىرىپ، ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ ەرەكشە قاجەتتىلىگى بار ازاماتتاردىڭ تۇرمىسىن جاقسارتۋ ماسەلەسى پرەزيدەنت قاسىم-جومارت توقاەۆتىڭ نازارىندا ەكەنىن اتاپ ءوتتى.
«قوعامنىڭ جەتىلۋ دەڭگەيى، ادامي، ازاماتتىق جاۋاپكەرشىلىگى ونىڭ ەرەكشە قاجەتتىلىگى بار ادامدارعا دەگەن كوزقاراسىمەن ولشەنەدى. ەلىمىزدە بۇل كوزقاراس وڭ باعىتقا قاراي وزگەرۋدە. وسى وزگەرىستەردىڭ وزەگىندە ەل پرەزيدەنتى قاسىم-جومارت توقاەۆتىڭ الەۋمەتتىك تۇرعىدا ادىلەتتى قازاقستاندى قۇرۋعا باعىتتالعان ساياساتى جاتىر. ءبىز ۇزاق ۋاقىت بويى مۇگەدەكتىگى بار ادامدار تەك قورعاۋ مەن كومەكتى قاجەت ەتەدى دەگەن تاپتاۋرىن قاعيدامەن ءومىر سۇردىك. ءدال قازىر بۇل ستەرەوتيپتەردىڭ ءمانى جويىلۋدا»، – دەدى ول.
ءماجىلىس سپيكەرى «جان شۋاق» سىيلىعىنا قاتىسۋشىلار – ەرىك-جىگەر مەن ۇلتجاندىلىقتىڭ ناعىز ۇلگىسىن كورسەتىپ كەلە جاتقان جەڭىمپازدار ەكەنىن جەتكىزدى. وعان – ۇلتتىق قۇرامانىڭ بيىلعى پاراليمپيادادا تابىستى ونەر كورسەتىپ، پاريج تورىندە سپورتشىلارىمىزدىڭ 9 مارتە جەڭىس تۇعىرىنا كوتەرىلگەنى ايقىن دالەل. پرەزيدەنت وسى تولاعاي تابىستى دە ەرەكشە اتاپ ءوتىپ، ەل مەرەيىن اسىرعان بارلىق پاراوليمپيادا جۇلدەگەرلەرى مەن باپكەرلەرىن مەملەكەتتىك وردەندەرمەن ماراپاتتادى.
ەرلان قوشانوۆ پارتيانىڭ «حالىقپەن بىرگە!» سايلاۋالدى باعدارلاماسىن جۇزەگە اسىرۋ اياسىندا مۇگەدەكتىگى بار ادامداردىڭ تاۋارلار مەن قىزمەتتەرگە تاپسىرىس بەرۋىنە ارنالعان «Aleumet» قوسىمشاسى ىسكە قوسىلعانىن، سونداي-اق ەرەكشە قاجەتتىلىگى بار 15 مىڭعا جۋىق ادام جۇمىسقا ورنالاستىرىلعانىن اتاپ ءوتتى. بۇعان قوسا، «كەدەرگىسىز كەلەشەك» جوباسى اياسىندا وسى جىلدىڭ وزىندە 4 مىڭ الەۋمەتتىك جانە كولىك ينفراقۇرىلىمى نىساندارى مۇگەدەكتىگى بار ازاماتتارعا ساي بەيىمدەلدى.
سونىمەن قاتار، ەكىنشى جىل قاتارىنان ماجىلىستە «ينكليۋزيۆتى پارلامەنت» دەپۋتاتتىق توبى جۇمىس ىستەۋدە. ونىڭ قۇرامىندا پارلامەنتتىڭ 20-عا جۋىق دەپۋتاتى بار. ولار اۋقىمدى جۇمىس اتقارىپ، ناتيجەسىندە تۇرعىن ءۇي ساياساتى جونىندەگى زاڭدا مۇگەدەكتىگى بار ادامدار مەن مۇگەدەكتىگى بار بالا اسىراپ وتىرعان وتباسىلاردىڭ تۇرعىن ءۇي الۋىنا ءبىرىنشى كەزەكتە قۇقىق بەرۋ كوزدەلدى، مۇگەدەكتىگى بار ادامداردى كوللەدجدەرگە قابىلداۋ كۆوتالارىنىڭ سانى ۇلعايتىلدى.
بيىل مەملەكەت باسشىسى ماجىلىسمەن ءارى «ينكليۋزيۆتى پارلامەنت» دەپۋتاتتىق توبىنىڭ مۇشەسى كەنجەعۇل سەيتجاندى حالىقتىڭ الەۋمەتتىك جاعىنان وسال ساناتتارىنىڭ قۇقىقتارى جونىندەگى ۋاكىل لاۋازىمىنا تاعايىندادى.
ءوز كەزەگىندە، قازاقستان مۇگەدەكتەر كونفەدەراتسياسىنىڭ پرەزيدەنتى جانات وماربەكوۆا «جان شۋاق» سىيلىعىن تاپسىرۋ ءراسىمى 2008 جىلدان بەرى وتكىزىلىپ كەلە جاتقانىن جانە وسى جىلدار ىشىندە 90-عا جۋىق ادام ماراپاتتالعانىن اتاپ ءوتتى. بيىل اشىق داۋىس بەرۋ ناتيجەسىندە ۇيىمداستىرۋ كوميسسياسىنىڭ شەشىمىمەن 8 لاۋرەات انىقتالدى.
«ءبىزدىڭ باستى مىندەتىمىز – مۇگەدەكتىگى بار ادامداردىڭ قوعاممەن بىتە قايناسىپ كەتۋىنە كومەكتەسۋ، الەۋەتىن اشۋ، ىسكە اسىراتىن جاڭا مۇمكىندىكتەر بەرۋ جانە ولاردىڭ اينالاداعى ادامدارعا قاجەت ءارى بەلسەندى بولۋعا دەگەن ۇمتىلىسىن قولداۋ، دامۋعا جانە العا ۇمتىلۋعا دەگەن شەشىمىن جان-جاقتى ىنتالاندىرۋ»، – دەدى ول.
وسىلايشا، قازاقستان تاريحىنداعى تۇڭعىش ەكى دۇركىن پاراليمپيادا چەمپيونى، پاۋەرليفتەر داۆيد دەگتيارەۆ «كۇش-جىگەرى جانە جەڭىسكە تالپىنىسى ءۇشىن» سىيلىعىنىڭ يەگەرى اتاندى.
«مۇگەدەكتىگى بار ادامداردىڭ عىلىم مەن ءبىلىم بەرۋ قىزمەتىن دامىتۋعا قوسقان ۇلەسى جانە وقۋعا تالپىنىسى ءۇشىن» نوميناتسياسىندا شىمكەنت قالاسىنىڭ تۇرعىنى ەرمەك باكيەۆ ماراپاتقا يە بولدى. ول بەس جىل بويى «وتىرار» تەلەارناسىندا «ەرەكشە جاندار» باعدارلاماسىنىڭ جۇرگىزۋشىسى بولا ءجۇرىپ، مۇگەدەكتىگى بار ادامداردىڭ شىعارماشىلىعى مەن جەتىستىگىن ناسيحاتتادى.
الماتى وبلىسى م.تۇيمەباەۆ اۋىلىنىڭ تۇرعىنى جەڭىسگۇل داۋلەتوۆا «كاسىپكەرلىك قىزمەتتى دامىتۋعا قوسقان ۇلەسى ءۇشىن» نوميناتسياسى بويىنشا لاۋرەات اتاندى. ايگىلى قولونەر شەبەرى 20 جىلدان بەرى كورپە، جاستىق جانە قازاق حالقىنىڭ ۇلتتىق كيىمدەرىن تىگۋمەن اينالىسىپ كەلەدى.
«مۇگەدەكتىگى بار ادامدارعا قاتىستى قوعامدىق سانانىڭ وڭ وزگەرۋىنە قوسقان ۇلەسى ءۇشىن» سىيلىعىن استانا قالاسىنىڭ تۇرعىنى، قوعام قايراتكەرى، ەرەكشە قاجەتتىلىگى بار ادامدارعا ارنالعان كوپشىلىك جارىستاردىڭ قاتىسۋشىسى جانە ۇيىمداستىرۋشىسى نۇرلان سىزدىقوۆيەلەندى.
«ونەر سالاسىنداعى ۇزدىك جەتىستىكتەرى ءۇشىن» نوميناتسياسى بويىنشا سەمەي قالاسىنىڭ تۇرعىنى ابىلايحان اسىلباي جەڭىمپاز اتاندى. زەرگەر – «ەكسپو – 2017» رەسپۋبليكالىق ساندىك-قولدانبالى ونەر شەبەرلەرى بايقاۋىنىڭ ءفيناليستى.
«مادەنيەت سالاسىنداعى ۇزدىك جەتىستىكتەرى ءۇشىن» سىيلىعىنىڭ يەگەرى – پەتروپاۆلدان كەلگەن «Sensitive» ەستۋ قابىلەتى بۇزىلعان بيشىلەر تەاترىنىڭ شىعارماشىلىق ۇجىمى. سولتۇستىك قازاقستان وبلىسىنىڭ ءانسامبلى 18 جىلدان بەرى جۇمىس ىستەپ كەلەدى. وسى ۋاقىت ارالىعىندا ولار تەك قازاقستاندا عانا ەمەس، الەمگە تانىمال ۇجىمعا اينالدى. بيىل فرانتسياداعى حالىقارالىق فەستيۆالدە «Sensitive» كانن شىعارماشىلىق ونەر فەستيۆالىنىڭ ۇزدىك حورەوگرافيالىق ۇجىمى رەتىندە تانىلدى.
«سپورت سالاسىنداعى ۇزدىك جەتىستىكتەرى ءۇشىن» نوميناتسياسىندا پاۋەرليفتينگتەن قازاقستاننىڭ بىرنەشە دۇركىن چەمپيونى، ازيا پاراليمپيادا ويىندارىنىڭ قولا جۇلدەگەرى، اقتوبە وبلىسى قاندىاعاش قالاسىنىڭ تۇرىعى گۇلىم قۇرمانباەۆا جۇلدەگەر اتاندى.
قوعامدىق قىزمەتتەگى ەڭبەگى ءۇشىن يران وماربەكوۆ اتىنداعى قوردىڭ ارنايى سىيلىعىمەن قىزىلوردادان كەلگەن بلوگەر زاۋرە وكسىمباەۆا ماراپاتتالادى.
ءار لاۋرەات 1 ملن تەڭگە كولەمىندە اقشالاي سىيلىققا يە بولدى.
سالتاناتتى راسىمگە قاتىسۋشىلار مەن قوناقتار ءۇشىن بەينەلەۋ جانە قولدانبالى ونەر كورمەسى ۇيىمداستىرىلدى. ونداعى ءار تۋىندىنى ەرەكشە قاجەتتىلىگى بار شەبەرلەر جاسادى.
«AMANAT» پارتياسىنىڭ ءباسپاسوز قىزمەتى
سۋرەتتى تۇسىرگەن: ءالي عالىم
