سولتۇستىك قازاقستان وبلىسى اققايىڭ اۋدانىنداعى دايىندىق اۋىلىنىڭ تۇرعىندارى اراق-شاراپتان تولىعىمەن باس تارتتى، دەپ حابارلايدى “ادىرنا” ۇلتتىق پورتالى.
دايىندىق اۋىلىنا 5 جىل بۇرىن وتباسىمەن كوشىپ كەلگەن زارينا ايۋپوۆا اۋىل تۋرالى ويىن ايتتى.
«بۇل اۋىلدا اراق مۇلدەم ىشپەيدى، بوس جۇرگەن ادام جوق، بارلىعى جۇمىس ىستەيدى، دۇكەندە الكوگول ساتپايدى، بارلىعى ءوز شارۋاسىمەن اينالىسادى. ءبىزدىڭ اۋىل تىنىش»، — دەيدى اۋىل تۇرعىنى.
ءبىر كەزدەرى قۇرىپ كەتۋدىڭ از-اق الدىندا قالعان اۋىل قازىر وڭىردەگى ۇلگىلى ەلدى مەكەندەردىڭ قاتارىنا ەنگەن.
«ۇزدىك 30 اۋىل» رەسپۋبليكالىق جوباسىندا ۇزدىكتەر قاتارىنان كورىندى. جەرگىلىكتى كاسىپكەر ءبىرجان شايمەردەنوۆ جۇمىس ورىندارىن قۇرىپ قانا قويماي، جۇمىسشىلارىنا جاڭا باسپانا تۇرعىزىپ جاتىر.
«ءبىز مۇندا جۇمىس ىستەي باستاعاندا اۋىلدا 28 ءۇي عانا بولدى، قازىر ولاردىڭ سانى 80-نەن اسىپ وتىر. حالىق سانى — 315 ادام. ءبىز وتباسىلاردى وسىندا كوشۋگە شاقىرامىز، جۇمىس ورنىن ۇسىنامىز، ءوندىرىستى ارتتىرامىز»، — دەيدى ءبىرجان شايمەردەنوۆ.
بۇگىندە اۋىل مەكتەبىندە 97 وقۋشى ءبىلىم الادى. تۇلەكتەر اۋىلعا قاجەتتى ماماندىقتى مەڭگەرىپ، قايتىپ كەلىپ جاتىر.
