وزبەكستان شەتەلدە تۇراتىن وتانداستارىن قولداۋ ءۇشىن ارنايى Vatandosh (وتانداس) كارتاسىن ەنگىزدى. بۇل باستاما پرەزيدەنت شاۆكات ميرزيەەۆتىڭ 2023 جىلدىڭ 20 قاراشاسىنداعى قاۋلىسى نەگىزىندە قابىلدانعان، دەپ حابارلايدى "ادىرنا" ۇلتتىق پورتالى fergana.agency-عا سىلتەمە جاساپ.
وزبەكستاننان شىققان، بىراق شەتەلدە تۇراتىن ازاماتتار Vatandosh كارتاسىن الا الادى. ول ۆيزاسىز وزبەكستانعا كىرۋ سياقتى بىرقاتار جەڭىلدىكتەر بەرەدى.
بۇل كارتا شەتەلدە تۇراتىن، بىراق وزبەكستاننىڭ الەۋمەتتىك جانە ەكونوميكالىق ومىرىنە بەلسەندى قاتىسىپ جۇرگەن وتانداستاردى ىنتالاندىرۋدىڭ ءبىر ءتۇرى. ول ەلدىڭ باسقا مەملەكەتتەرمەن دوستىق قارىم-قاتىناستارىن نىعايتۋعا ايتارلىقتاي ۇلەس قوسقان جانە قايىرىمدىلىقپەن اينالىساتىن تۇلعالارعا بەرىلەدى.
كارتا بەس جىلعا جارامدى، بىراق ونىڭ جارامدىلىق مەرزىمى ۇلتتىق تولقۇجاتتىڭ مەرزىمىنەن اسپايدى. كارتانى بەرۋ تۋرالى شەشىمدى ارنايى كوميسسيا قابىلدايدى. ۇمىتكەرلەر وزبەكستان مينيسترلىكتەرى مەن ۆەدومستۆولارىنىڭ ۇسىنىمدارى نەگىزىندە قارالادى.
كارتانى پايدالانۋشىلار ۆيزاسىز وزبەكستانعا كىرۋگە، تۇرۋعا رۇقساتسىز جىلجىمايتىن مۇلىك ساتىپ الۋعا، قوسىمشا رۇقساتتارسىز جۇمىسقا ورنالاسۋعا، وزبەكستان ازاماتتارىنا ارنالعان مەديتسينالىق، ءبىلىم بەرۋ جانە باسقا مەملەكەتتىك قىزمەتتەردى پايدالانۋعا مۇمكىندىك الادى.
بۇل ارتىقشىلىقتار وتانداستارعا ارنالعان جەڭىلدەتىلگەن كارتا يەلەرىنىڭ وتباسى مۇشەلەرىنە دە قاتىستى. ولاردىڭ اتا-انالارى، جۇبايى جانە بالالارى ەلدەن شىقپاي-اق ۆيزانى بىرنەشە رەت ۇزارتۋ مۇمكىندىگىنە يە بولادى. سونىمەن قاتار، ىشكى ىستەر ورگاندارى ولار ءۇشىن رەسپۋبليكا اۋماعىندا ۋاقىتشا تىركەۋدى جانە ونىڭ مەرزىمىن ۇزارتۋدى تەگىن راسىمدەيدى.
پرەزيدەنت جارلىعىندا اتاپ وتىلگەندەي، Vatandosh كارتاسىن ەنگىزۋ باستاماسى شەتەلدە تۇراتىن وتانداستاردى قولداۋعا جانە ىنتالاندىرۋعا، ولاردى تاريحي وتانىمەن بىرىكتىرۋگە، ەلگە دەگەن ماقتانىش سەزىمىن نىعايتۋعا، ۇلتتىق سانا-سەزىمدى ساقتاۋعا جانە ولارمەن تۇراقتى ديالوگتى كەڭەيتۋگە باعىتتالعان.
