اتىراۋداعى ءتورت تۇلىك ساتاتىن بەس بازاردىڭ بىرىندە ولگەن سيىردان ءسىبىر جاراسى انىقتالدى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىدە تاراعان اقپاراتقا سايكەس، 12 قاراشادا بازار قىزمەتكەرى سيىردىڭ ءولىپ جاتقانىن بايقاعان. كەيىن انىقتالعانداي، بۇل مال باتىس قازاقستان وبلىسىنان اكەلىنگەن.
ۆەتەريناريالىق باقىلاۋ جانە قاداعالاۋ كوميتەتى اتىراۋ وبلىستىق اۋماقتىق ينسپەكتسياسى باسشىسىنىڭ ۋاقىتشا مىندەتىن اتقارۋشى نۇركەن باياروۆتىڭ مالىمدەۋىنشە، بازار جابىلىپ، ونداعى مالدارعا تولىقتاي ۆاكتسيناتسيا جاسالىپ، 14 كۇن باقىلاۋعا الىناتىن بولادى. قالا كارانتينگە جابىلمايدى. سەبەبى، باسقا ايماقتاردا مۇنداي اۋرۋ تىركەلمەگەن.
بۇگىن ولگەن سيىردان ءسىبىر جاراسى انىقتالعانى راستالدى. ماماندار بازارداعى بارلىق مال يەلەرىن تەكسەرۋدى باستادى. قازىرگى ۋاقىتتا بازاردا 56 سيىر، 79 قوي جانە 7 جىلقى بار. سونىمەن قاتار، قالاداعى باسقا مال بازارلارىندا دا قوسىمشا تەكسەرۋلەر جۇرگىزۋ جوسپارلانىپ وتىر.
