ەربولات دوساەۆ وسى جىلدىڭ تامىز ايىندا قىزمەتىنە كىرىسكەن گەرمانيا فەدەراتيۆتىك رەسپۋبليكاسىنىڭ الماتى قالاسىنداعى جاڭا باس كونسۋلى ماتتياس كيسلەرمەن كەزدەستى.
كەزدەسۋ بارىسىندا ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىقتى دامىتۋ پەرسپەكتيۆالارى، سونداي-اق وڭدەۋ ونەركاسىبىنە، دەنساۋلىق ساقتاۋ، ەكولوگيا جانە تسيفرلاندىرۋ سالالارىنا ينۆەستيتسيا مەن تەحنولوگيا تارتۋ جايى تالقىلاندى. اتاپ ايتقاندا، الماتىنىڭ يندۋستريالىق ايماعىندا گەرمانيانىڭ ينۆەستورى جۇزەگە اسىراتىن جالپى قۇنى 75 ملرد تەڭگە بولاتىن جانە 300 جۇمىس ورنىن اشاتىن جىلۋ وقشاۋلاعىش ماتەريالدار شىعاراتىن زاۋىت قۇرىلىسى جونىندەگى ماسەلەلەر قارالدى.
سونىمەن قاتار، ەنەرگەتيكا سالاسىنا ارنالعان جابدىقتار مەن كومپونەنتتەر وندىرۋمەن اينالىساتىن جەتەكشى ترانسۇلتتىق كومپانيالاردىڭ ءبىرىنىڭ ايماقتىق سەرۆيس حابىن ورنالاستىرۋ مۇمكىندىگى تالقىلاندى. بۇل حاب ورتالىق ازيا مەن كاۆكاز ەلدەرىندەگى سالالىق كومپانيالارعا سەرۆيستىك قولداۋ كورسەتەدى دەپ بولجانۋدا.
جالپى، ەكى ەل اراسىنداعى تاۋار اينالىمى ءداستۇرلى تۇردە جوعارى دەڭگەيدە ساقتالىپ كەلەدى. بيىلعى 9 ايدا بۇل كورسەتكىش 1 ملرد اقش دوللارىنان استى. بۇگىندە الماتىدا نەمىس كاپيتالىنىڭ قاتىسۋىمەن 396 كاسىپورىن نەمەسە قازاقستاندا ورنالاسقان بارلىق كاسىپورىننىڭ ۇشتەن ءبىرى جۇمىس ىستەيدى.
كەزدەسۋ قورىتىندىسى بويىنشا تاراپتار ءوزارا قارىم-قاتىناستى نىعايتۋعا ۋاعدالاستى جانە بىرقاتار بىرلەسكەن جوبانى ىسكە اسىرۋعا دايىن ەكەندىكتەرىن ءبىلدىردى.
